Seestrome 2015: Hoe ons die Bybel lees

10 December 2015

Posted by:

NG Kerk Gansbaai

Posted in:

Dit is altyd vir my verskriklik hartseer dat die een element van die Reformasie, naamlik die bevrydende wete dat almal die Bybel mag lees en dan ook in hulle eie taal, tot soveel verdeeldheid lei. Die een geskrif wat ons saambind, laat ons ook uitmekaar spat. Daar is baie redes, maar die groot rede het seker te make met hoe ons die Bybel lees en die Bybel in ons argument gebruik.Ons vergeet die Bybel is ‘n antieke geskrif, geskryf deur mense wat steeds oortuig was dat die wêreld plat is. Die vrae wat ons vandag vra, het hulle nie altyd gevra nie en is die Bybel nie geskryf om te antwoord nie. Dit is nie ‘n handboek vol wetenskaplike kennis nie, maar ‘n geloofsboek wat praat oor God en sy verhouding met die volk Israel, die kerk en die hele skepping.

As ons dan die Skrif nader om ons te help met die verstaan van kwessies waarmee die groeiende wetenskaplike kennis ons konfronteer, is daar nie altyd direkte antwoorde of “verse” nie. Die Bybel skryf niks reguit oor kloning, ewolusie, kapitalisme, genadedood, aborsie en noem maar nog op, nie. Ons vergeet dit en daarom stry ons. Die wetenskaplike veld van genetika leer ons dat mense ‘n ingebore seksuele oriëntasie het. Die kennis is nuut. Die Bybelskrywers het dit nie geweet nie en daarom antwoord hulle nie reguit ons vrae oor homoseksualiteit of selfde geslag-verhoudings nie.

Wat doen ek as die Bybel nie reguit vir my antwoorde gee nie? Ek soek dan riglyne en waardes waarbinne ek keuses maak. Daarvan is die Bybel vol. Kyk ons net in die Nuwe Testament verkondig Jesus se lewe ‘n ingesteldheid van insluit en nie uitsluit nie, van omhels en nie wegstoot nie. Vir Jesus is daar nie

tweedeklasburgers in die koninkryk of kerk nie.

Ons leer God in die Bybel ken as die Skepper. Die Skepper van die hele mens. Hoekom dan beskou ons so maklik ‘n deel van die geskapenheid, naamlik die seksuele, as sleg en sondig? God het ons mos goed gemaak. Ons seksualiteit is tog ‘n verlenging van ons menswees. Ons is almal na sy beeld geskep, elke mens, gay of straight.

Dan leer die Bybel ons dat God mense kies tot sy diens.Van Genesis af roep Hy mense. Meestal net gewoonlik die mens wat ons nie sou kies nie: die bedrieër (Jakob), die rokjagter (Simson), die jongste (Dawid en Josef), die vrou (Debora, Ester), die Moabiet Rut, die skaapwagter, die tollenaar en so kan ons opnoem. As ons riglyne wil opstel van hoe God roep, sal dit seker die
teenoorgestelde behels van wie ons sou kies. Hoekom dan betwyfel ons die geroepenheid van iemand wat ‘n ander seksuele oriëntasie het? Werk God nie juis deur die “ander” met my nie?

Die Nuwe Testament help ons verstaan sonde is nie dinge nie, maar ‘n ingesteldheid wat die self hoër ag as God. Sonde is in alle verhoudinge, daar waar ek misbruik, selfsugtig is, die ander nie respekteer nie. Daar waar ek die “son” word waarom almal moet draai. Ons het grootgeword met lysies sondes: rook, drink, dans, ens. Jy kan miskien niks van daardie goed doen nie, maar dit gaan nie jaloesie, selfsug en bitterheid uit jou hart neem nie. Ek en die een oor wie ek wil oordeel, is maar dieselfde mens, beide liewer vir myself as vir God.

Hoe maak ons dan met kerklike besluite? Nooit vanuit die posisie dat ek alles verstaan nie of die waarheid in pag het nie. Eerder dat ons altyd biddend en soekend na God se wil is. Dat ons saamlees en bestudeer - eerder huiwerig, tastend, maar met liefde en insluit as my grense. Eerder te veel deernis as ‘n moontlikheid van oordeel. Dit sal God ons immers vergewe - aangesien God se deernis die aarde oorlopens toe vul.

Written by:

Dr. Lisel Joubert

Hierdie historiese kerk is geleë in die hart van Gansbaai se middedorp en staan al vir meer as 50 jaar in die bediening van jonk en oud. Die kerk se ryk geskiedenis dateer terug tot 1909 en vandag het die kerk meer as 2550 lidmate en oor die 300 doop lidmate. Die kerk bedien die hele Gansbaai wat d...

View Profile