Seënwense aan ons leraars en hul families

Aan ons leraars, ook al die 2015 aflosleraars en hul geliefdes, wil die NGK- en VGK kerkraadslede, namens die gemeentes, ‘n geseënde Christusfees en voorspoedige nuwe jaar toebid. Ontvang ook ons dank vir julle pastorale sorg en geestelike leierskap deur die afgelope jaar. Dankie dat julle menigmaal onder moelike omstandighede en emosioneel-uitmergelende tye, altyd met sagte oë en Jesusliefde ons ondersteun en geeste-lik gelei het!. God seën u.

Seënwense van VGK

Die kerkraad van die VGK wens almal graag ’n geseënde Kersfees en voorspoed en geluk toe vir 2016.  Maar die meeste van alles bid ons ons Here se vrede, liefde, genade, seën en groei as Christengelowiges vir elkeen in ons gemeentes toe.

Gebed: Nuwe Jaar…

Here, Almagtige, oneindige Skepper, Voleinder, ‘n jaar is vir U net ‘n oogwink,  maar vir ons is dit 365 dae lank, ‘n lang pad.

Here, vir ons is elke jaar volgepak met goed en kwaad. U is Here van elke uur en dag en jaar. Maar ons is gevange slawe van die vervlietende tyd. Here, en tog bring elke jaar ons nader aan U. Mense word jaar vir jaar ouer, maar u kinders word jonger. ‘n Jaar lê agter ons, vir altyd verby. Plek-plek loop die pad pylreguit deur die vlakte, ander kere met kronkel-paaie oor die steiltes, vol slaggate, pap wiele, verpaste treine, verspeelde geleenthede.

Here, oor die geleenthede wat onbenut verbygegaan het, sou ek wanhopig kon raak, as dit nie was dat U vergewe nie.

Here, elke dag is u genade nuut,  sedert Noag se reënboog, en is u goedheid nuut, sedert Jesus Christus . . .

Here, as U die hare op my kop getel het,

het U sekerlik ook my dae getel, die minute en sekondes daarvan -  alles hou U in die palm van u hand. Here, ek dank U vir gesondheid in die jaar wat verby is. Ek bid vir gesondheid in die een wat voorlê, vir genoeg kos vir elke dag. Maar veral bid ek om ‘n  honger na u Woord, na U self . . . Dit sal weer ‘n jaar wees vol van U genade!  AMEN  Bron: Groot Gebedeboek.(‘n Gebed uit Ghana).