David Jones benoem in  sy boek “Soul making” die drie groot vrae van ons Christelike pad as volg: Waar vind ek dat ek geliefd is en geken word sonder grense? Waar beleef ek versoening, vergiffenis en herstel? Wanneer, op watter punt in my lewe, hou ek op om myself te regverdig en laat ek toe dat ‘n nuwe hart binne my gevorm word? Die nuwe hart is tog dit wat aan ons geskenk word as ons verlang, soms ook uit die bloute. Die profeet Jeremia skryf in die moeilike tyd van die ballingskap: “Daar kom ‘n tyd. . . ” en dan “Ek sal my woord op hulle harte skryf en dit in hulle gedagtes vaslê.” (31: 31; 33). Die King James vertaal dit as volg: “I will put in my law in their inmost parts, and write it in their hearts.” Dit volg op plek waar ek myself nie meer verontskuldig nie, maar juis omdat ek ontdek het dat ek die geliefde is.