Pinkster 2018

Susan du Toit deel haar ervaring van die Pinkstertyd in Gansbaai: “Vanjaar se Pinksterreeks is deur ons leraars, dr Lisel Joubert, ds Dirk van Dyk en ds Willie Kotze gelei. Die tema: Verlange na meer is bespreek. Die Pinksterreeks het ons tot diepe nadenke gestem en na ons geestelike toestand laat kyk. Ons moet ‘n dors en smagting ontwikkel na God en Sy wil, getrou as volgelinge van Christus leef, ten spyte van ander se aanstoot aan Jesus se boodskap (Lukas 7:31-35). Christenskap het egter ‘n hoë prys van selfverloëning en gehoorsaamheid aan God se wil.

Ons moet ‘n passie ontwikkel om God se Woord uit te leef, anders is ons soos sout wat laf geword het en ons word ernstig gewaarsku teen verflouing van ons geloof. (Heb.10:26,27 en Matt 5:18).

Daar is vreugde in die hemel oor elke verlore persoon wat tot bekering kom; daarom moet ons ook nuwe volgelinge van Christus met liefde en deernis laat tuis voel in ons gemeente. Vrydagaand het ons die reeks afgesluit met ‘n gesellige Pinkerstermaal wat deur die Vrouediens voorgesit is. Sondag is ons weer versterk in ons geloof met die Nagmaal”