21 Dae en 21 Psalms

Kry vir jou notaboekie/scrapbook en kryte van alle kleure. Rig ‘n spesifieke tyd in die dag hiervoor in.

DAG 1 - PSALM 1

1. Word stil. Haal diep asem. Maak jou oë toe. Word bewus van jou lyf (van toon tot kroon).

2. Skuif jou fokus na jou gehoor (ore). Wat hoor jy alles of wat hoor jy skielik nie?

3. Maak jou oë oop. Kyk na die kleure in die vertrek asof jy dit vir die eerste keer raaksien.

4. Dank God vir 5 dinge in die hier en nou.

5. Lees Psalm 1 hardop en stadig deur - sommer 3 maal (as jy ander vertalings tot jou beskikking het, lees hulle ook).

6. Watter woord of frase staan vir jou uit? (geen reg of verkeerd nie)

7. Skryf daardie woord/frase op in jou boekie of op ‘n stuk papier en trek ‘n sirkel om dit.

8. Skryf al die assosiasies wat jy het met die woord binne die sirkel neer.

9. Tree in gesprek met God oor die woord of frase.

10. Hou die woord/frase heeldag op jou tong en herkou dit en voor jy gaan slaap skryf jy weer op papier gedagtes wat bygekom het of plak ‘n prent wat jy die dag raakgesien het wat jou daaraan laat dink het.

Onthou in die Psalms is die regverdiges nie mense sonder sonde nie. Die Psalms praat van mense wat God nie in agneem nie, nie tel nie, as goddeloos en regverdiges is sondaars wat tog God ag in hulle lewe. (Mindful of God vs Forgetful of God)

[Direkte Vertaling vers 1-3, ek verander ook hierin “hy” na “sy” vir bietjie inklusiwiteit:

"Gelukkig is die mens

wat nie die raad van die goddelose

mense volg,

nie op die pad van sondaars staan

en nie in die byeenkoms van die spotters sit nie,

maar wat vreugde in die wet van

die Here vind

en sy wet dag en nag prewelend opsê.

So iemand sal wees soos ‘n boom

geplant langs watervore,

wat haar vrugte op haar tyd gee

en waarvan die blare nie

verdor nie.

Alles wat sy aanpak, gedy.”