Pinksterboodskap 27 Mei 2020: Dag 3

Elke jaar neem ons tydens Pinkster kollekte op vir die Bybelgenootskap. Ons vra dat julle asb hierdie jaar weer oorweeg om hul te ondersteun met die 5 dae se kollekte wat jy sou kerk toe bring.

Die Bybelgenootskap van SA
ABSA Santyger
Rek nr: 550 220 288
Takkode: 632 005
Verwysing: Pinkster

Meditasie geskryf deur Dr Lisel Joubert

Dag 3

1. Word stil in jou Pinksterplek. Haal diep asem en word teenwoordig. Word bewus van jou asemhaling, jou lyf, jou omgewing. Jy is nou in die nou, en God is ten volle -nie in bietjies nie- ten volle nou teenwoordig deur sy Heilige Gees. Word bewus van jou gedagtes, jou emosies. Sonder oordeel. Dit is wie jy nou is in die teenwoordigheid van die Goeie God.

2. Luister na die Woordboodskap van ds Barend Vos. Wat hoor jy vandag oor die werk van die Heilige Gees. Wat is die een ding wat jy graag met iemand wil deel - oor wil getuig? Lees gerus Handelinge 1: 8; Romeine 8: 26-27.

3. Hoe lyk jou getuienismandjie? Watter woorde is almal daarin gepak wat iets verwoord van jou lewe saam met God. Skryf hulle neer (miskien is daar ook leë blokkies want daar is altyd nie woorde nie).

4. Thomas Keating het geskryf dat stilte God se moedertaal is, Sy eerste taal. In die tyd word ons meer genooi na stilte vanweë omstandighede. Wat is jou verhouding met stilte? Waag met niks praat sodat God jou kan kom verras. Dit is ook gebed - die gebed van “hier is ek”.

5. In die Benediktynse tradisie is daar baie stilte. Hulle praat daarvan dat taal ‘n gawe is en ons is rentmeesters van woorde. Ons moet hulle mooi en reg gebruik. Dit behels ook dat ons soms minder moet praat oor God, want eintlik verstaan ons nie die misterie nie. Die vierde eeuse kerkvader Gregorius van Nyssa het geskryf dat ons aan God moet dink soos ons asemhaal - gedurig - maar miskien minder oor Hom moet praat. Hy skryf dit is nie verkeerd om baie oor God te praat nie, maar nie altyd “timely” is nie: “What is good loses its goodness if it isn’t done in a good way”.

6. Hoor God wat vandag vir jou sê “Shhhhhh”, word stil, my Gees verstaan.

Kliek op hierdie skakel om na Dr Barend Vos se stemboodskap te luister.