So wonderlik soos wat slimfone ook al mag wees, ’n mens kan verslaaf raak aan hierdie toestelle. Volgens die kundiges by die Cleveland Kliniek se Sentrum vir Gedragsgesondheid kan die oorgebruik van selfone net soos enige ander verslawing wees. Hier is twee waarskuwingstekens: jou slimfoon meng in met jou lewe, en jy kry onttrekkingsimptome wanneer jy probeer afskaal.

Vra jouself die volgende vrae om te kyk hoe gesond jou verhouding met jou foon is:

• Meng die gebruik van jou slimfoon in met jou werk, of is dit moeilik om as gevolg daarvan op take te konsentreer?
• Dink jy aan jou slimfoon terwyl jy dit nie gebruik nie?
• Voel jy ongeduldig of geïrriteerd as jy dit nie vashou nie?
• Hou jy konstant jou foon dop, en vir langer periodes as wat jy voorgeneem het? Sê gesins- en familielede dat jy dit te veel gebruik?

Indien jou slimfoongebruik in die gevaarsone is, probeer om dit te verminder. Probeer om elke dag ’n paar uur opsy te sit sonder jou
foon. Stel doelwitte en hou tred met wat jy sonder jou foon doen, soos om te lees of by jou familie te wees.

Sit aan die einde van elke dag tyd opsy vir ontspannende aktiwiteite soos meditasie of musiek luister. Sit jou foon af terwyl jy dit doen. Indien dit te stresvol is, sit ten minste die kennisgewings af.

Moenie dat jou foon met ’n nag se rustige slaap inmeng nie. Hou op om dit te gebruik ten minste ’n uur voordat jy gaan slaap - as jy kort voor slaaptyd te veel na toestelskerms kyk, kan dit inmeng met die liggaam se natuurlike proses van ontspan voordat jy gaan slaap. Maak seker om dit nie oornag in jou kamer te laai waar die kennisgewings jou sal steur wanneer jy ’n boodskap ontvang nie.