Is neute goed vir die geheue?

’n Studie van die Universiteit van Suid-Australië het getoon dat die eet van neute verband hou met beter denke en geheue onder Chinese volwassenes van 55 jaar en ouer.  Die studie, wat 4 822 deelnemers gehad het, het gevind dat deelnemers wat meer as 10 gram neute per dag geëet het (gelykstaande aan twee teelepels) se kognitiewe funksie met tot 60% kon verbeter vergeleke met dié van studiedeelnemers wat nie neute geëet het nie. Die studieleier het gesê dat data wat oor 22 jaar ingesamel is, getoon het dat 17% van die deelnemers aan die China-gesondheidsvoedingopgawe gereeld neute geëet het - meestal grondboontjies - wat spesifieke anti-inflammatoriese en antioksidantuitwerkings het wat kognitiewe agteruitgang kan verlig en verminder.

Grondboontjies is egter peulgewasse, nie regtig neute nie. Hierdie is nie die eerste studie wat bewys het dat neute ’n voor delige uitwerking het nie. In ’n studie deur UCLA het navorsers gevind dat ’n kwart koppie okkerneute daagliks gekoppel kan word aan verlaagde risiko vir depressie. Hulle het berig dat meer as 26 000 Amerikaanse volwassenes op ’n vraelys gereageer het oor wat hulle oor twee dae geëet het, asook hoe gereeld hulle depressiesimptome ervaar het, soos dat hulle sukkel om te slaap of te veel slaap, belang verloor om goed te doen, moeg voel, min energie het en probleme het om te konsentreer. Ontleding van die terugvoer het gewys dat depressietellings 26% laer was by mense wat gesê het hulle het okkerneute geëet, en 8% laer was by diegene wat ander neute geëet het (vergeleke met mense wat gesê het hulle het geen neute geëet nie).

Onlangse navorsing uit Singapoer dui verder daarop dat meer as twee porsies sampioene weekliks die risiko vir geringe kognitiewe agteruitgang met 52% kan verminder, terwyl een tot twee porsies dit met 43% kan verminder.’n Porsie is gedefinieer as ’n driekwart koppie gaar sampioene.

Hierdie resultate kom uit ’n ses jaar lange studie waarby meer as 600 Chinese bejaardes in Singapoer deelgeneem het. Navorsers het elke deelnemer se kognitiewe funksie getoets en onderhoude en ondersoeke gebruik om hulle mediese geskiedenis en dieetgewoontes vas te stel. Die sampioene wat geëet is, het vars, gaar goue oestersampioene, shitake en wit dwergsampioene, asook gedroogde en geblikte sampioene ingesluit, maar die navorsers het gesê dat ander tipes ook heelwaarskynlik ’n voordelige uitwerking sal hê.

Bron: The journal of nutrition, health & aging, Februarie 2019