Wat Presies is Prediabetes?

Voordat ’n persoon tipe 2-diabetes ontwikkel, toon hulle dikwels ’n toestand wat prediabetes genoem word.

Tot 30 persent van pasiënte met prediabetes sal binne vyf jaar tipe 2-diabetes ontwikkel, het die Centers for Disease Control and Prevention (CDC) waargeneem.

Prediabetes verhoog nie net ’n persoon se risiko om diabetes te ontwikkel nie - dit kan ook tot ander ernstige gesondheidsprobleme soos hartsiekte en beroerte lei.

Iemand wat met prediabetes gediagnoseer word, het bloedglukosevlakke wat hoër as normaal is, maar nog nie by die gevaarlike vlakke van diabetes nie.

Prediabetes is ’n toestand wat voorkom wanneer bloedglukosevlakke hoog is, maar nie hoog genoeg om as diabetes gereken te word nie. Die toestand verhoed iemand om glukose in die liggaam behoorlik te verwerk en verlaag die hoeveelheid insulien wat deur die pankreas afgeskei word.

Die presiese oorsaak van prediabetes is onbekend, maar daar is verskeie faktore wat ’n persoon se risiko verhoog om prediabetes te ontwikkel, insluitende: ouderdom - veral na die ouderdom van 45 jaar; oorgewig of vetsug; ’n familiegeskiedenis van diabetes; ’n geskiedenis van diabetes tydens swangerskap; minder as drie keer per week se oefening.

Prediabetes het nie enige duidelike tekens of simptome nie, maar talle mense met die toestand ervaar vroeë simptome van tipe 2-diabetes. Daardie simptome sluit in ’n prikkelgevoel, ’n dooie gevoel of pyn in die hande of voete, gereelde urinering, oormatige honger en/of dors, onduidelike sig, en snye of kneusplekke wat stadig genees.

As iemand enige van die simptome van tipe 2-diabetes het, of bekommerd is dat hulle ten minste een van die risikofaktore vir prediabetes het, word daar aanbeveel dat hulle ’n vastende plasmaglukosetoets laat doen. Dit vereis dat hulle vir ten minste agt uur lank voor die toets niks mag eet of drink nie en dan hulle vastende glukosevlakke moet toets.

Die aanpas van iemand se leefstylkeuses kan help om hulle bloedsuikervlakke weer normaal te kry, en te voorkom dat hulle volwaardige tipe 2-diabetes kry. Wanneer ’n persoon prediabetes het, word daar aanbeveel dat hulle sewe persent van hulle liggaamsgewig afskud, en ook gesonder eet en vyf dae per week oefen. Party mense kan selfs diabetesmedikasie nodig hê.