Wat is goeie voeding?

Voedsel en voeding is die manier waarop ons die brandstof inneem wat ons liggaam van energie voorsien. Ons moet elke dag die voedingstowwe in ons liggaam met nuwe voorraad vervang.

Water is ’n belangrike komponent van voeding. Vette, proteïene en koolhidrate word ook benodig. Dit is ook belangrik vir goeie gesondheid om die vlakke van noodsaaklike vitamiene en minerale te handhaaf. Vir swanger vroue en volwassenes ouer as 50 is vitamiene soos vitamien D en minerale soos kalsium en yster belangrik om in ag te neem wanneer voedsel en moontlike dieetaanvullings gekies word.

’n Gesonde dieet bevat baie natuurlike voedsel. ’n Groot gedeelte van ’n gesonde dieet moet uit vrugte en groente, veral rooi, oranje of donkergroen groente en vrugte bestaan.

Volgrane soos volkoring en bruin rys moet ook ’n rol in jou dieet speel. Vir volwassenes moet suiwelprodukte vetvry of laevet wees. Proteïen kan bestaan uit maer vleis en pluimvee, seekos, eiers, bone, peulgewasse en sojaprodukte soos tofu, asook ongesoute sade en neute.

Goeie voeding sluit ook in om sekere tipes voedsel te vermy. Natrium word baie in verwerkte voedsel gebruik en is gevaarlik vir mense met hoë bloeddruk. Volwassenes moet minder as 300 milligram (mg) cholesterol per dag inneem (word aangetref in onder andere vleis en volvet-suiwelprodukte).

Gebraaide kos, harde vette en transvette in margarien en verwerkte voedsel kan skadelik wees vir hartgesondheid.

Verfynde grane (witmeel, witrys) en verfynde suiker (tafelsuiker, hoëfruktose-mieliestroop) is ook sleg vir langtermyngesondheid, veral vir mense met diabetes. Alkohol in hoeveelhede van meer as een porsie per dag vir ’n vrou en twee per dag vir ’n man kan ook gevaarlik wees vir die gesondheid.