Skelm teer sy pad terug selle toe
‘n Ou skelm het Maandag spreekwoordelik in die leeu se bek ingestap toe hy ‘n...
Luisterryke koorsang en lofprysing het die NGK se kerkgebou Sondag, 17 September 2017 met ‘n geweide atmosfeer gevul.
7 kore in die Ring van Caledon het aan die Ring Korefees deelgeneem, waarna hulle as ‘n massakoor die byeenkoms afgesluit het.
Die organiseerder, Aletta Löchner, Gansbaai-koor se koorleidster, en haar helpers het verseker dat dit die beste korefees ooit was.
Aletta het ook as koorleidster vir die massakoor opgetree.
Die program het sonder onderbreking vlot verloop, met dr Lisel Joubert wat die verwelkoming en opening hanteer het en ds Willie Kotze wat die Bybelvoorlesings tussen die onderskeie items behartig het.
Die geleentheid is ingelei met orrelspel deur Winand Grundling van Stellenbosch. Winand is ‘n begaafde jong orrelis met verskeie nasionale en internasionale toekennings agter sy naam. Gedurende die verloop van die program het Winand verdere orrelitems gelewer, terwyl Helena van der Merwe, ‘n begaafde violis van Somerset-Wes, vir uitstaande solospel gesorg het – asook gekombineer met Winand se orrelspel.
Jack White, De Kelders se talentvolle trompetspeler, het toehoorders weer eens verras met sy talent.
Gansbaai kerkkoor het Jesus wat my siel bemin (Charles Wesley) en Hoe lieflik is U woninge (Chris Lambrecht) gesing, met Aletta Löchner as koorleidster en Annelene Reinke as begeleier.
Die Gansbaai Mannekoor het die Magaliesbergse Aandlied (GG Cillié) gesing.
Ander kerkkore wat deelgeneem het, is Grabouw, Hermanus, Kleinmond, Riviersonderend, Suidpunt en Villiersdorp.
Die hoogtepunt van die korefees was die massakoor (al 7 kore) se luisterryke optrede, met Aletta Löchner as koorleidster, begelei deur Winand Grundling (orrel) en Jack White (trompet).
Die massakoor se spesiale liedere was Hosanna (Niel van der Walt), Kerslied (John Knox Bolwe), Heil’ge Nag (Ernst A Dicks; Beardsleij; J van der Walt), Grote God (Pierre Malan; Kerneels Esterhuizen) en Stille Nag (Frans Grüber).
Die onderskeie kore is voor die aanvang van die korefees met ‘n middagete onthaal en na afloop van die geleentheid het die koorlede saam met vriende in die Pretoriussaal saam gekuier.
