Dodelike Voëlgriep Teiken Wilde Seevoëls

Dodelike Voëlgriep Teiken Wilde Seevoëls

Asof COVID-19 nie erg genoeg was vir ons mense nie, tref H5N1 nou ook nog ons seevoël bevolking

Kort op die hakke van “Afrika Pikkewyn bewusmakingsdag” wat gewoonlik jaarliks op 9 Oktober tydens talle spesiale geleenthede op 'n vrolike noot gevier word, volg die slegte nuus dat ten minste 1 500 wilde seevoëls, hoofsaaklik Kaapse kormorante, alreeds deurgeloop het onder 'n virale voëlgriep epidemie (H5N1) wat met mening toegeslaan het.

Alhoewel die siekte nie onbekend is aan voëlkenners nie, wek die huidige omvang daarvan wel kommer. Die feit dat ons tans in die broeiseisoen is en dat groot getalle kormorante dan gewoonlik saamdrom - veral in broeikolonies - speel vermoedelik 'n rol.

Drie verskillende gebiede waarvan een aan die Weskus en ten minste twee in die Overberg, is uitgesonder as dié areas waar hierdie seevoëls tans deurloop. Inwoners van Struisbaai en omstreke is sedertdien ook versoek om op die uitkyk te wees vir siek of dooie voëls 

Virus bedreig mense nie, maar moenie raak aan die siek of dooie voëls nie

Organisasies soos SANCCOB en Bird Life SAwat gewoonlik betrokke is by reddingsoperasies wanneer seevoëls beseer of onder oliestortings deurgeloop het, is tans nou betrokke by die monitering van kusgebiede waar karkasse van dooie voëls en siek voëls opgetel en verwyder word.

Inwoners van die Kaap Agulhas subdistrik wat rondbeweeg in die omgewing tussen die De Mond Natuurreservaat en Agulhas, is versoek om op die uitkyk te wees vir siek of dooie voëls. Na wat verneem is, loop die kormorant bevolking in die omgewing van Dyer eiland ook tans deur. 'n Ernstige vermaning om nie aan die karkasse te raak of die siek voëls te probeer help nie, is egter ook uitgereik

Minister vra samewerking van lede van die publiek

Minister Anton Bredell, Wes-Kaapse Minister van onder meer Omgewingsake, het Dinsdag, 19 Oktober in 'n persverklaring lede van die publiek versoek om saam te werk en om siek of dooie voëls waarop hulle sou afkom dadelik te rapporteer. “Die volgende 14 dae is 'n kritieke tydperk” ten einde die uitbraak onder beheer te probeer bring,het hy gesê. Die simptome wissel van swakheid tot spierspasmas en rukkings - op Engels “seizures” - wat herinner aan epileptiese aanvalle by mense. Sou lede van die publiek enige iets wou rapporteer - erniemellet@gmail.com. Indien geen verteenwoordiger van 'n bewaringsorganisasie byderhand is nie, kan Cape Nature wat De Mond en Dyer Island bewaringsareas beheer asook SANParke vir verwysings gekontak word.

Ora Laubscher