Jeanette Xanini, Eluxolweni se Biblioteek Assistent, het ‘n gesellige “biblioteekpartytjie” vir kinderlede, wat gereeld besoekers aan die biblioteek is, gereël. “Ek sê sommer dadelik baie dankie vir hulle gereelde besoeke aan die biblioteek,” het sy gesê. Die ouer kinders, ook gereelde besoekers aan die biblioteek, het vir ‘n pragtige opvoering van Jesus se geboorte gesorg, wat terdeë deur die gaste geniet is. Wat sou so ‘n gesellige partytjie sonder Kersvader wees? Jack Peppers het gesorg dat die kinders nie teleurgestel word nie en het “onverwags” as Kersvader opgedaag, wat natuurlik ‘n baie groot verrassing vir almal was.  

Jeanette rig ook graag die volgende bedankings (alfabeties) aan borge en ondersteuners, waarsonder die geselligheid nie so ‘n groot sukses sou wees nie: Flip en Sandra (Pearly Beach Minimark); Jan en Nelia Koekemoer (Pearly Beach Strandoord); Michael Fuchs (Klein Paradys); Rdl Dudley Coetzee (DA). Hierdie Sateliet-biblioteek is verlede jaar in Eluxolweni deur die Wes-Kaapse Minister van Kulturele Sake en Sport, min Anroux Marais, en die Overstrandse Uitvoerende Burgemeester, Raadsdame Nicolette Botha-Guthrie, geopen. Raadsdame Botha-Guthrie het toe gesê dat die Overstrand Munisipale Raad sowat 3 jaar vantevore, kort nadat die biblioteek in die nabygeleë Buffeljachts woongebied oopgestel is, ‘n besoek aan die Eluxolweni woongebied gebring het.

Die sowat 1,500 inwoners van Eluxolweni het hul behoefte aan ‘n openbare biblioteek onder haar aandag gebring en sy het haarself tot die bevrediging van die behoefte verbind. Alles is toe in die stryd gewerp om ‘n biblioteekdiens aan hierdie gediversifiseerde woongebied, waar ongeveer 70% Xhosa sprekende persone en 30% Afrikaans sprekende persone woonagtig is, te voorsien.

Hardus Botha

Zoom