“Wingerdvrug geselligheid” is die leuse tydens Gansbaai Wynproegilde se maandelikse byeenkomste.

Die aanbieder, JM Crafford (witwynmaker) van Stettyn Wynkelder is deur voorsitter Theuns Roodman aan die woord gestel en ‘n puik wynproe-aanbieding met uitstaande wyne het gevolg. JM is oorspronklik van Darling, Swartland en voltooi sy studies aan die Universiteit van Stellenbosch.

Daarna spandeer hy twee jaar in die VSA (Tombauer Vineyards), ses maande in Australië (Victoria-Michelton Wines) en drie jaar by Riebeeck Kelders as assistant wynmaker.

In 2012 sluit hy as witwynmaker by Stettyn Wynkelder aan, tussen Villiersdorp en Worcester, aan die oostelike berghange van die Klein Drakenstein bergreeks. “Ons verkies kwaliteit eerder as kwantiteit,” het JM gesê. Die gaste is bederf met ‘n smaaklike Straw Wine  (2011) as “voorgereg”. Daarna volg Pinot Grigio (2016), Sauvignon Blanc (2016), Merlot (2014), Cabernet Sauvignon (2014) en Shiraz (2014), met ‘n duursame Cape Vintage Port (2008) as “nagereg”. Die lede en gaste het deurgaans ‘n sterk silwer aan die onderskeie wyne toegeken, met goud vir die Merlot. Die wynproe-aand is by McClarke’s, The Hide-Away aangebied, met Marins McClarke wat haarself oortref het met ‘n hoender Corden Bleu, soet-suur vark, rys, gebraaide aartappels en groentes. Haar dogter, Margie het vir flink bediening gesorg. Theuns en Marlene van der Walt het die gebruiklike blyk van waardering, ‘n Gansbaai Wynproegilde voorskoot aan JM oorhandig.

Vir navrae rakende Gansbaai Wynproegilde kan Amanda de Vries by 028-388-0708 of 082-577-6920 geskakel word, of stuur ‘n e-pos aan haar by info@franskraalbandb.co.za.

Hardus Botha

Zoom