Skelm teer sy pad terug selle toe
‘n Ou skelm het Maandag spreekwoordelik in die leeu se bek ingestap toe hy ‘n...
Aan die stuur van die nuwe Eigelaar Marine Store, is ‘n man met ‘n hart vir die see – Pieter du Toit.
Pieter ken die seebedryf. As boorling van De Doorns het hy kompeterend aan Rots-en-Strand hengel deelgeneem en met Boland Kleure as junior en senior hengelaar na Presidentskleure gevorder.
Na skool het hy kommersieel lynvis gevang saam met welbekende Oom Pieter (Kalbas) du Toit. Op die boot Runtu, van oorlede Oom Eben Wessels het hy die treilvisbedryf betree. Hy het ook saam met Oom Eben se seun, Ian – van die welbekende boot “Wildegans” gewerk.
Aan die einde van 2000 is hy terug De Doorns toe om sy pa in sy supermark by te staan, maar die besigheid is verkoop nadat sy pa se gesondheid ernstig agteruit gegaan het.
Pieter het teruggekeer na waar sy hart lê en sy brood as lynvisser in Gansbaai kom verdien.
‘n Nuwe wêreld het vir hom oopgegaan toe hy in 2010 ‘n werksaanbod van Marine Dynamics ontvang het. Hy was aanvanklik deel van die bootbemanning, maar het hom binne ‘n jaar opgewerk as skipper van die bote Slashfin en Dream Catcher. Pieter is baie dankbaar vir dit wat Wilfred Chivell, direkteur van die Marine Dynamics groep, vir hom beteken het.
Met hierdie agtergrondkennis van die vissersbedryf, was Pieter dus die ideale persoon vir die Eigevis-groep wat vandeesmaand aan boord gekom het in Gansbaai met hul Eigelaar Marine Store. Die groep is bekend oor die hele Weskus met winkels van die Kaap tot by Mosselbaai.
Die goed gevestigde maatskappy besit ook ‘n paar hotelle en drankwinkels. Hulle doel is om goeie diens te lewer in Gansbaai.
Pieter word in die winkel bygestaan deur Gerald Visser, ‘n gebore Gansbaaier met ‘n stewige agtergrondkennis van die see.
