Gansbaai Courant

Blog: So moet jy maak, sê hy

Published: 18 November 2016
By:Seemeeu

So ‘n paar jaar gelede het Jacques Viljoen (een van die jonger Hardebaarde, daardie tyd) sy mening gelug oor hoe hy sy hengeltegniek toepas.  Ons herhaal hiermee sy interessante sienswyse, woord vir woord:

“Ek glo aan die volgende:  Elke vis het sy tyd en plek, maar daar is altyd die uitsondering – vang die vis volgens die tyd van die jaar en die weer.  Die noordwester byvoorbeeld, maak die water warmer en veroorsaak dat die vis dieper byt.  Dit is egter dieselfde kabeljou wat vlak én dieper byt.  Normaalweg, tydens die somer se suidoosterwinde beweeg die vis na Frikkiesbaai, asook na Holbaai.  My geliefkoosde tyd vir Franskraal is gedurende Desember tot Maart.  Ek verkies ‘n 11/0-hoek vir die kabeljou en ‘n lynsterkte van 46kg.  Soms sal ek ‘n tjokka heel aansit, met die kopkant na die hoek se punt toe.  Normaalweg gebruik ek ook ‘n heel sardyn as aas en ‘n ligte sinkertjie, in geval van ‘n stroom.  ‘n Ander tegniek van my is om ‘n twakkie se ruggraat uit te sny en dan die kop en die twee sye saam as aas te gebruik.  ‘n Ligte lyn deug nie vir my nie.  Nog iets waaraan ek glo:  Soek die sandsloepe op – sonder om geraas te maak.  “Dik” water is uit.  Die kleur moet half deurskynend wees.  In die aand is vaalwater egter nie so kritiek nie.  My visstok gebruik ek om moeilike plekke te bereik.  Let ook maar op, wanneer die aasvissies ophou met byt is dit moontlik, omdat die ou groot bulle skielik opgedaag het.”

Sy kommentaar bly steeds baie interessant. Dankie weer eens, Jacques.  Almal wat hierdie man ken weet dat hy al heelwat van die groot bulle op sy kerfstok het, so neem maar kennis.

Hou die volgende ook in gedagte:  Sleepvis (die vis moet nie gesien word nie) sandvis (die vis word in die sand gebêre) en nou ja, galjoen – een en dieselfde ding!

Die amptelike vangseisoen is verby en as jy so ‘gelukkig’ is om te  deel in hierdie vangste, wees gewaarsku.  Die boete is allervreesliks.

Groete,
Seemeeu

Recent Posts

Lojale SAPD-lid se s...
Published: 18 August 2017
By: Gansbaai Courant

Polisiemanne is verslae na die skielike dood van &...

Meester-skrywers
Published: 18 August 2017
By: Gansbaai Courant

Gansbaai se twee getoë Strandvelders en ook k...

Vermiste op see stee...
Published: 18 August 2017
By: Gansbaai Courant

 ‘n Man, vermoedelik van Mosselbaai, wa...

Vyf droom... en een ...
Published: 18 August 2017
By: Gansbaai Courant

Vyf finaliste het oor ‘n splinternuwe motor ...