Skelm teer sy pad terug selle toe
‘n Ou skelm het Maandag spreekwoordelik in die leeu se bek ingestap toe hy ‘n...
Die wat hul hare kon vleg het dit gevleg en die wat kon strikkies insit het dit ingesit. Netjies geklee in Gansbaai Primêr se skooldrag, het gemeentelede van die St Marks Anglikaanse Kerk Sondag, 15 Januarie 2017 vir ‘n “Terug-Skool-Toe” ere-diens by die kerk opgedaag. Kerkgangers het skryfbenodigdhede en klere vir die graad 1 klasse van Gansbaai Primêr saamgebring om ouers te help om hul skoolkinders volledig toe te rus vir die nuwe skooljaar.
Vader George Wyngaard van die St Marks Anglikaanse Kerk vertel dat die spontane gedagte dat hulle soos skoolkinders aangetrek het, groot byval gevind het en baie humor aan die dag verleen het. “Dit was ‘n kostelike gesig om te aanskou,” sê Vader George.
Vader Wyngaard, sy eggenote, Jenny en Maria Salo (Kapelvoog) het die volgende Donderdag, 19 Januarie die donasies aan Tommy Volkwyn, die skoolhoof van die primêre skool, oorhandig.
Die twee graad 1 juffrouens, Maresa de Villiers (Gr 1.1) en Melissa Doyel (Gr 1.2) was baie dankbaar vir die skenking.
Die kleingoed het nie op hulle laat wag nie en hulle eerste liedjie wat hulle vanjaar geleer het, “Weet jy dat Jesus jou lief het” uit volle bors vir die besoekers gesing.
“Ek vertrou dat julle hierdie geskenke sal waardeer, mooi daarna sal kyk en dat julle baie hard sal leer om volgende jaar na graad 2 oor te gaan,” het Vader Wyngaard die graad eentjies gemotiveer.
