“Ons jeug en ons toekoms” was die leuse vir Gansbaai Toerisme se skryfbehoefte- en voedselprojek waartydens Gansbaai Toerisme onlangs letterlik hande gevat het met Gansbaai Helpende Hand.

Met die hulp van plaaslike, sowel as donateurs buite Gansbaai, kon die entoesiastiese Doulene Els van Gansbaai Toerisme daarin slaag om 15 voedsel- en 30 skryfbehoeftepakkies aan dié organisasie te skenk.

Melody Scheepers het Helpende Hand by die oorhandiging  van  die pakkies op 26 Julie verteenwoordig.

“Ons dankbaarheid oor hierdie gebaar kan nie in woorde omskryf word nie,” het Melody gesê.

“Die nood in Gansbaai is hoog en nou is daar 30 minderbevoorregte kinders wat volledige skryfbehoeftepakkies gaan ontvang, asook 15 minderbevoorregte gesinne wat voedselhampers gaan ontvang.”

Gansbaai Helpende Hand ontvang geen lotto- of regeringsfondse nie en is alleenlik op skenkersgelde aangewese,” het Melody gesê.

Belangstellendes wat behulpsaam wil wees met donasies, skenkings of ondersteuning, kan Gansbaai Helpende Hand, Maretha Geldenhuys, by 082-805-3964 kontak.

Doulene se Mandeladag reëlings

Doulene Els van Gansbaai Toerisme het haarself ook op Mandeladag oortref met verskeie reëlings wat sy namens Gansbaai Toerisme geïnisieer het.

Onder ander het sy ‘n volledige BARC-dag (Birkenhead Animal Rescue Centre) gereël waar ondersteuners met honde gaan stap het en groot hoeveelhede honde- en kattekos geskenk is.

Sy het ook gereël vir die skenking van 67 bome wat onderskeidelik by verskeie voorskoolse sentrums in Gansbaai, Blompark en Masakhane deur vrywilligers geplant is.

Zoom

Zoom