Die verdwaasde bobbejaan. Nadat hy deur kragdrade by Franskraal Waterwerke geskok is
“Moenie die bobbejaan agter die bult gaan haal nie”, maar toe doen kees-se-kind dit self en loop hom in sy eie bobbejaanstreke vas. Danie Maree, Snr Bestuurder Elektro Tegniese Dienste van Gansbaai Munisipaliteit, vertel van die bobbejaanmannetjie wat vir ‘n kragonderbreking by die Franskraal Waterwerke verantwoordelik was. “Hy het vermoedelik teen die paal opgeklouter en homself met die drade misgis,” sê Danie.
Toe die manne hom kry, was kees-se-kind goed lam in die agterlyfie en hulle het hom versigtig agter in een van die voertuie gelaai en veearts toe geneem. Danie sê hulle het die voorval by die munisipale natuurbewaringsafdeling aangemeld. Daar het Bennie Kondokter hulle meegedeel dat slegs CapeNature in so geval die laaste besluit het of die diertjie uitgesit moet word en of hy gerehabiliteer gaan word. Intussen het Bennie Gansbaai Courant meegedeel dat dié nuuskierige knaap toe gelukkig nie uitgesit is nie, maar hulle het hom weer by sy trop laat aansluit - dus is die “lam agterwêreld” vergete, maar hopelik nie die les wat hy geleer het nie.
Inwoners word versoek om die teenwoordigheid van bobbejane naby aan residensiële erwe summier aan die munisipale owerhede te rapporteer sodat hulle verwyder kan word voordat dit ‘n groot probleem raak.
Hardus Botha
