Pragdier opgetel

Die pragtige “ru-haar” windhond by BARC se hokke wat na ‘n   liefdevolle eienaar opsoek is

 ‘n   Pragtige en yslike groot rondloper “ru-haar” windhond is deur ‘n   anonieme diereliefhebber van Gansbaai langs die R43 naby Stanford raakgeloop, met geen eienaar in sig nie. Sy het die hond aan Philip Schreck van BARC oorhandig, wat dit ‘n   tydelike tuiste in BARC se hokke gebied het. Die hond  is ‘n   gesteriliseerde reun en tree baie liefdevol op. Navrae in hierdie verband kan aan Philip gerig word. BARC is steeds volspoed aan die gang en die nuwe hondehokke en kattehuis (cattery) was beslis ‘n   groot aanwins, maar ondersteuning deur die gemeenskap vir hierdie groot verantwoordelikheid bly steeds ‘n   noodsaaklikheid. Dit gaan eweneens goed met BARC se Tweedehandse Winkel, danksy skenkings deur die gemeenskap. Tweedehandse artikels, hoe “oud” ookal, soos veral kombuisware, linne, gordyne, handdoeke, ornamentjies en enige ander snuisterye word deurlopend benodig. Die winkel is op die hoeke van Hoof- en Korporasiestrate geleë en hulle besigheidsure is Maandae tot Vrydae vanaf 08:30-17:00 en Saterdae vanaf 08:30-13:00. Finansiële bydraes ten bate van BARC kan direk in die volgende bankrekening inbetaal word (meld net die donateur se naam, of “anoniem” indien so verkies): BARC - Nedbank Gansbaai - Takkode 196 005 - Rekeningnommer 149 810 3006 - Spaarrekening.

“Dit gaan ook baie goed met ons Facebook-blad, “BARC Gansbaai Animal Welfare”, wat reeds met vele vriende en diereliefhebbers, ook vanaf oorsese lande, spog,” vertel Annalie Jonker van BARC. Met die Fees van die Ganse op 21 September 2013 reeds in sig, kan inwoners gerus van die gewilde BARC Troeteldierskou onthou. Meer inligting, asook die presiese datum, sal mettertyd bekendgemaak word.

Vir enige navrae en/of skenkings/donasies kan Annalie Jonker by 028-384-1740 of 082-826-0631 geskakel word. Vir diere-probleme en/of die aanneem van diere, kan Phillip Schreck (Veldwerker) by 083-742-3903 geskakel word.     
                         
Hardus Botha