Christa de Vries oorhandig Gansbaai Lionsklub se welkome tjek ten bedrae van R3,000 aan Kobus Koekemoer vir Gansbaai Academia se 2013 Matriekafskeid
“Gansbaai Lionsklub het die behoefte by Gansbaai Academia raakgesien met verwysing na fondse wat dringend vir die 2013 Matriekafskeid benodig word,” vertel Christa de Vries van Gansbaai Lionsklub. Sy sê die Lions het diep onder die indruk daarvan gekom en besluit om te help. “Matriekafskeidfunksies is jaarliks ‘n hoogtepunt vir elke matriekleerder, terwyl dit soms onbekostigbaar kan wees.” Die Gansbaai Lionsklub het besluit om R3,000 vir hierdie doel opsy te sit, wat op Woensdag, 17 Julie 2013 oorhandig is. Adjunkhoof Kobus Koekemoer het die tjek in die afwesigheid van die skoolhoof, Tommy Wilson in ontvangs geneem. Tommy sterk tuis aan nadat ‘n operasie vir ‘n drie-dubbele hartomleiding onlangs op hom uitgevoer is. Kennis kan geneem word dat dit sommer baie goed met Tommy gaan. Kobus het sy opregte dankbaarheid namens die skool teenoor die groot gebaar van Gansbaai Lions uitgespreek. Tydens die oorhandiging van die tjek is die interessante opmerking gemaak dat Kobus homself in die jare 1997/98 ‘n Lion President van Gansbaai Lionsklub was.
“Gansbaai Lionsklub nooi graag alle besighede en instansies, maar ook individue, uit om selfs net R50 per maand vir Gansbaai Academia se Matriekafskeid beskikbaar te stel,” sê Christa. Gansbaai Academia kan by 028-384-2370 gekontak word, of stuur ‘n e-pos aan hulle by admin@gbacademia. wcape.school.za.
Hardus Botha
