Die dames van die Woekermark wat blomme ontvang het, met vlnr Francia van Dyk, Petro van der Nest en Berta Brits
Vrydae se Woekermark in die Pretoriussaal het verlede Vrydag, 19 Julie 2013 sy 6de verjaardag gevier. Dit was die “manne” se beurt vir die koek- en teestalletjie en hulle het heel flink en vriendelik voorgekom, met een wat ewe flink met die skinkborde heen en weer gedraf het. Die pannekoekstalletjie vir die verjaardag was ten bate van Herberg-aan-See se bestanddele vir hulle basaar wat op 21 September vanjaar, saam met die Fees van die Ganse gaan plaasvind. “Die Woekermark het 6 jaar gelede in geloof begin en ek wil graag ons ondersteuners baie dankie te sê vir hulle getroue ondersteuning, asook vir alle deelnemers en werkers,” sê Francia van Dyk, koördineerder van die Woekermark, wat ‘n yslike bos blomme ontvang het. Toe lek dit uit dat een van die manne teenwoordig, Johan van Wyk, bekend vir sy betrokkenheid by Sendingwerk, op dieselfde dag verjaar het.
Eddie Barnard, die gewilde musiekmaker tydens die Woekermarkdae, se 86-jarige suster het ook kom kuier en “sy is nog só gesond dat sy nie weet van dokters, medikasie of pille nie”. Vrydae se Woekermarkte begin elke Vrydag om 09:00 in die Pretoriussaal. Vir enige navrae kan Francia van Dyk by 028-384-0262 of 082-551-3613 gekontak word.
Hardus Botha
Dit was die “manne” se beurt om koek en tee/koffie te bedien, met Johan van Wyk (links) wat op dieselfde dag as die Woekermark verjaar het
