Jaarlikse groot pret en opwinding! Dis die beskrywing van Herberg-aan-See Tehuis vir Bejaardes (HaS) se jaarlikse Winterspele. Vanjaar se “Spele” is met lekker saam dans deur die inwoners ge-open en hulle het bewys die “ou” bene is nog pure aan die gang. Dalene van Dyk en haar Goue Hand-medehelpers het vir vele pret gesorg. Speletjies soos vlugbal met balonne, raai-‘n-woord, ringbord, albaster-met-lepel-optel en veel meer is gespeel. Soos gebruiklik was daar weer ‘n personeelitem, tot groot vermaak van die inwoners.
Gansbaai Courant mag glo nie noem waar Suster Linda Meyer haar item weggesteek het nie, maar dit is wel gekry en uitgehaal! Die stimulasiegroep het ‘n opwindende skattejag gereël en daar is naarstigtiglik na lekkers en “chippies” gesoek wat weggesteek is. Anita Botha het agter die klavier ingeskuif en die inwoners het hulle daarin verlustig om “toeka” se liedjies uit volle bors te sing.
Dankie ook aan Anita wat as fotograaf vir die dag ingestaan het. Lesers word herinner aan Suster Linda Meyer (028-384-0501) se versoek om leë 500ml, 1ltr en 2ltr plastiekbottels met proppe wat dringend vir HaS benodig word.
Hardus Botha
