Die Junior Afdeling wenners van die Mej Sea Star Kompetisie
Dit was weer tyd vir die kies van ‘n Mej Sea Star, Junior en Senior, vir die Sea Stars Netbalklub. “Die aand het suksesvol verloop, met deelnemers wat eintlik almal wenners was omdat hulle só pragtig gelyk het,” vertel Bertruline Dickson, voorsitter van die klub. Die gesellige aand is ter stywing van die klub se fondse gereël. Ongelukkig het die kamera wat deur hulle gebruik is, nie so goed saamgewerk nie, en kon net ‘n foto van die Juniors aan Gansbaai Courant beskikbaar gestel word. Intussen het die klub 2 wedstryde gespeel.
Op 20 Julie was dit tuis teen Kleinmond, met die B-spanne wat terselfdertyd hulle proewe gespeel het. Tydens daardie wedstryd het die A-span met 19-22 verloor en die B-span het met 12-8 gewen. “Dit was die eerste keer hierdie jaar wat ons A-span verloor het,” sê sy. Verlede Saterdag het hulle teen Blompark se Sea Gulls gespeel, met die Sea Stars as algehele oorwinnaars: die A-span 42-19 en die B-span 32-16.
Eerskomende Saterdag speel die Sea Stars weg teen Bredasdorp. Vir navrae rakende die Sea Stars Netbalklub kan Bertruline Dickson by 072-707-5687 geskakel word.
Hardus Botha
