OK Foods Gansbaai se trotse eienaars Petra en Chris van Rensburg.
OK Foods Gansbaai kry welverdiende erkenning vir ’n prag-winkel. Na volgehoue harde werk, onbuigbare deursettings-vermoeë en ‘n streng beoordelingssessie het OK Foods Gansbaai sy merk gemaak en is aangewys as een uit drie top handelaars wat meeding in die OK Foods kategorie vir die gesogte titel van OK se Franchisee Van Die Jaar 2013. OK Foods Gansbaai is ’n lid van die OK franchise-divisie, ’n afdeling van die Shoprite/Checkers-groep.
Petra van Rensburg, winkeleienaar, vertel van haar en mede-eienaar Chris van Rensburg se wen-resep: “Jy moet passie hê vir jou besigheid en jou dagtaak met geesdrif aanpak.” Petra beduie dat OK Foods Gansbaai se sukses grotendeels toegeskryf kan word aan puik spanwerk: “Kies die regte mense vir jou span en bemagtig hulle binne ‘n kreatiewe en opbouende organisasiekultuur. Jy moet ‘n stel beginsels en waardes hê waarvolgens sake gedoen moet word – integriteit en beginselvastheid is hoekstene in ons besigheid.” Hoe voel Petra en Chris oor die nominasie? “Geweldig trots! Wat ‘n groot voorreg om genomineer te word vir so ‘n gesogte toekenning!”
Om te verseker dat die wenners die erkenning waarlik verdien, het die OK franchise-divisie ’n omvattende lys van vereistes saamgestel waarvolgens die winkels oor die loop van ’n jaar beoordeel word. Hierdie lys sluit ontwikkeling, algemene winkelstandaarde, klantediens, personeel-motivering, gemeenskapsbetrokkenheid, administratiewe uitmuntendheid en lojaliteit in.
Die klem is dus nie bloot op verkope nie – die winkels wat die beste presteer in die beoordelingsproses is winkels wat waarlik ’n uitstekende begrip van uitnemendheid in die konteks van die kleinhandelsbedryf toon. Die wen-winkels moet kan bewys dat hulle ook ernstig is oor hul klante (diens en inkopie-ervaring), gemeenskap en winkelvoorkoms.
Petra, Chris en hul personeel kan hulself voorberei op moontlike verdere sukses omrede OK Foods Gansbaai nou in aanmerking is vir die 2013 Franchisee Van Die Jaar-toekenning as die beste OK Foods-winkel. Die wenner sal in September by die jaarlikse OK franchise-divisie konferensie aangekondig word.
