Die realistiese brandtoneel tydens die Fynbos- & Musiekfees
Die 2013 Gansbaai Fynbos Expo het gekom en veels te gou gegaan. Daar is maande lank aan beplan en reëlings getref vir hierdie aanbieding, wat vanjaar in ‘n nuwe formaat aangebied is. Die deelnemers, almal vrywilligers, het eers die veld en plase ingevaar waar boere en grondeienaars GRATIS en met entoesiasme die blomme en plante beskikbaar gestel het. Elke blom, plant en spesievoorbeeld is daarna met sorg uitgesoek. Tydens die opstel van die uistalling in Gansbaai Academia se skoolsaal was dit opmerklik hoe elkeen van die deelnemers met passie en toewyding kop omlaag geswoeg het om hierdie keur van ons omgewing se fynbos te vertoon. En het hulle almal nie uitstekend daarin geslaag nie! Om enigiemand uit te sonder is ‘n gans onmoontlike taak, maar die leiding van Anita Botha en Aletta Groenewald, asook Gansbaai Academia se samewerking verdien spesiale vermelding. Ook Glenda Kitley se organisering van alles wat plaasgevind het word waardeer.
Haar toewyding was opvallend. Aan elkeen van die persone en werkers wat op welke manier ookal ‘n bydrae gelewer het, kan ons net ons hoogste lof en waardering betuig. Woorde kan nooit daaraan reg laat geskied nie. Ek en die Gansbaai Toerismeburo wil langs hierdie weg graag elke ander persoon wat by die geleentheid betrokke was, van harte bedank, hetsy stalletjiehouers, musikante, kelners, skoolpersoneel, komiteelede, Munisipaliteit, gaste, besoekers, ens. ens. Die nabetragting waar die hele naweek “uitgepluis” sal word, sal so gou moontlik gehou word. Ons begin ook nou reeds elkeen op ons eie manier beplan vir 2014 se Gansbaai Fynbos & Musiek Expo. Ons sien daarna uit om hierdie nuwe aanbieding as ‘n spoggeleentheid verder uit te bou en te vestig vir Gansbaai en die Overstrand.
Johan Pieterse, Voorsitter : Gansbaai Toerismeburo
