Kleuters se uitstappie

Die Flower Valley Voorskool se kleuters het etlike besighede en instansies in Gansbaai op 2 Augustus besoek. Dit was omtrent ‘n konsternasie om dié nuuskierigheid dop te hou. Die uitstappie het deel gevorm van die skool se kurrikulum onder die tema: Verskillende Werke. Die plaaslike veearts, dr Liesel Trollope, se spreekkamer is besoek, waar hulle ingelig is en ook die geleentheid ontvang het om ‘n hond te was. (Die hond het dit wel oorleef!)


‘n Interessante besoek aan dr Liesel Trollope, plaaslike veearts, se spreekkamers

By Gansbaai Poskantoor het die jong leerders meer geleer oor hoe ‘n brief by sy bestemming beland. By Gansbaai OK Foods is verskillende afdelings van die winkel besoek, terwyl elke kleuter ‘n geskenkie ontvang het. Hulle uitstappie is by Gansbaai Biblioteek afgesluit, maar nie voordat daar op die gras voor die munisipale kantore piekniek gehou is nie. In die Biblioteek is ‘n storie aan hulle voorgelees, met nog ‘n geskenkie wat aan elkeen uitgedeel is. Flower Valley Voorskool bedank graag die betrokke besighede en organisasies wat die uitstappie moontlik gemaak het en wat gesorg het vir ‘n leersame dag in Gansbaai vir die kleuters.

Vir enige navrae oor die Flower Valley Voorskool kan Natasha Forbes by 072-150-4826 geskakel word, of stuur 'n e-pos aan haar by elc@flowervalley.co.za.   
Hardus Botha


In Gansbaai OK Foods is selfs die vleisrakke behoorlik “ge-inspekteer”