Die ywerige groep dames besig met die voorbereiding van Basaarpasteie wat vir Herberg-aan-See se basaar gebak gaan word
Die voorbereiding vir die gewilde basaar ten bate van Herberg-aan-See (HaS) is volstoom aan die gang. Gansbaai Courant het by die Pretoriussaal gaan inloer en ‘n groep ywerige dames daar gekry - hard besig om “Basaarpasteie” voor te berei wat gebak gaan word. “Verlede jaar het ons 2,229 pasteie gebak en vanjaar sal daar 2,424 pasteie wees,” vertel Francia van Dyk, sameroeper. Sy sê sowat 14 dames het binne die bestek van 2 dae (slegs 3 ure per dag) die voorbereiding vir die groot hoeveelheid pasteie gedoen. Kennis kan nou reeds geneem word dat die 2de been van die Fees van die Ganse wat op 21 September met die basaar sou saamval, weens verskeie faktore na Saterdag, 7 Desember vanjaar uitgestel is. (Volledige inligting in die volgende uitgawe). Dit kan net beklemtoon word dat HaS se basaar nie deur hierdie besluit geraak word nie, en ook nie die “Groet die Grotman”-vertoning nie. Daar kan dus steeds na HaS se basaar uitgesien word.
Vir navrae, hulpverlening en/of donasies ten opsigte van die basaar, kan Francia van Dyk by 028-384-0262 of 082-551-3613 gekontak word.
Hardus Botha
