‘n Groefoto deur Hugh-Daniel Grobler van Gansbaai Fotografieklub se lede wat onlangs aan ‘n deeglike praktiese fotosessie deelgeneem het
Dit was behoorlik flitsende kamera’s van sowat 20 lede tydens Gansbaai Fotografieklub se onlangse praktiese foto-sessie. Baie moeite is gedoen en die reeks praktiese oefeninge is professioneel onder leiding van Marc du Plesis, Kompetisie-beampte, uitgewerk en beplan. Die lede is in groepies verdeel om by verskeie vooraf opgestelde punte vir die neem van foto’s uit te kom. Ses verskillende tipe omstandighede vir die neem van foto’s is geskep en die groepe het om die beurt van die een punt na die ander beweeg. Die onderskeie kategorieë, wat elk spesifieke kameraverstellings vereis het, was: Rookspore met wierook wat opstyg (smoke trails); Portretfotos met studioligte; Beligtingstegniek met blomme; Lopende gekleurde water wat uit ‘n wynglas gegooi word; Gekleurde gliserien op water, met foto’s wat van bo-af geneem is. Deurentyd is lede met professionele advies soos beligting, verstellings, benutting van driepote en dies meer bedien.
Die groep was dit eens dat dit die mees interessantste praktiese oefening was wat nóg aangebied is en gerus herhaal kan word.
Een van die vele puik foto’s tydens die praktiese fotosessie, deur Nina Martin
Knapgedaan, Marc en helpers, dit was ‘n bogemiddelde byeenkoms. “Ons het lekker hard gewerk om alles gereed te kry en ook om na die tyd op te ruim en ek bedank graag almal wat gehelp het en ‘n bydrae gelewer het om so ‘n groot sukses van die byeenkoms te maak,” sê voorsitter Christo Wessels. Gansbaai Fotografieklub se volgende byeenkoms is vir Maandag, 16 September om 18:30 te Kerkstraat 30 geskeduleer en almal is welkom.
Vir navrae kan Christo Wessels by 082-920-9738 of Linda Kloppers by 082-550-7313 geskakel word.
Hardus Botha
