Vlytige dames onder leiding van Alice Bredenkamp (links) is hier besig met die bak van sowat 430 pakkies klein koekies vir HaS se Basaar
Groot pret en vele te kope en te ete en te geniete wag tydens volgende week se Herberg-aan-See (HaS) se jaarlikse en gewilde basaar. Groot koeke, kleinkoekies, pasteie, koeksisters, tombola-, wit-olifant- en naaldwerktafels, konfyte en veel, veel meer as wat opgenoem kan word. Daar sal ook ander vermaak, asook kindervermaak, beskikbaar wees, onder andere Flip Otto se bekende treintjie wat op die Kerkgronde gaan rondry. Naas vele ander harde voorbereidingswerk en “gebak en gebrou” is verlede week dosyne pasteie voorberei, met dosyne kleinkoekies en koeksisters wat hierdie week gebak en gemaak is. Die Fees van die Ganse is welliswaar na 7 Desember verskuif, maar die basaar ten bate van HaS gaan volstoom aan op Saterdag, 21 September en sal om 10:00 geopen word. Moet dit nie misloop nie en moenie laat daar aankom nie, dan ís dit misgeloop!
Basaarnavrae kan aan Francia van Dyk by 028-384-0262 of 082-551-3613 gerig word.
Hardus Botha
