Gansbaai Krieketklub het Sondag hulle tweede oorwinning behaal deur 'n baie sterk span van Kleinmond KK, tuis met 2 paaltjies te klop.
Kleinmond KK het 'n redelike begin gehad met die kolf, maar kon as gevolg van 'n goeie boulvertoning deur Gurchwin Davids (5-0-20-0); Driaan Kriel (7-0-23-1); Corrie Avenant (8-0-36-4) en Johan Botha (5-0-14-1) slegs 'n totaal van 133 lopies almal uit in 30.4 boulbeurte aanteken. Kleinmond se beste kolwers was C Singleton met 25 (1x4) en R Serfontein met 28 (2x4) lopies. Gansbaai se vangwerk was nie baie goed nie en verskeie vangkanse is nie benut nie.
Gansbaai het toe gaan kolf en was danksy 'n tweede paaltjie-vennootskap van 64 lopies tussen Corrie Avenant 31 (4x4) en Driaan Kriel 59 (1x4)(2x6) goed op pad na 'n oorwinning. Daar het toe skielik 'n kolf-ineenstorting plaasgevind waarin daar 7 paaltjies geval het. Dit het veroorsaak dat die wedstryd op 'n spannende einde afgestuur het. André Hage het egter die wenlopies met 'n grenshou (4) behaal. Gansbaai se totaal was 134/8 na 30.2 boulbeurte. Driaan Kriel was as die speler van die wedstryd aangewys. Die klub bedank vir Theuns Otto vir die paaltjies wat hy geskenk het en Driaan Kriel vir die wedstrydballe. Eerskomende Saterdag vind die Mayoral Cup wedstryde plaas op die Gansbaai Gemeenskap Sportgronde. Om 10:00 speel Hermanus vs Hawston en 14:00 speel Gansbaai vs Hermanus. Sondag reis Gansbaai na Kleinmond om 10:00 teen Hawston te speel. Sterkte en voorspoed.
Sportiewe groete
Heinrich Vermeulen, 082 715 3179
