‘n Deel van Gansbaai Fotografieklub se lede tydens hulle gesellige jaarafsluiting by Tolbos Bistro
Gansbaai Fotografieklub se fotograwe het onlangs in Tolbos Bistro tydens ‘n gesellige Jaareindfunksie “afgeskakel”, maar sekerlik nie hulle kamera’s nie. Daarvoor is hulle te bedrywig en die kamera’s sal sonder twyfel nog gereeld gedurende die vakansieseisoen flits. Die groep het Wayne Devitt se afsluitingsete terdeë geniet en die gesellige groep fotograwe kon vergeet van kamera’s, kompetisies, beplannning en byeenkomste en die aand net ontspanne geniet. ‘n Voorlopige jaarprogram vir 2014 is reeds opgestel, met die klub se eerste byeenkoms wat op 20 Januarie 2014 sal plaasvind. Lede word genooi om hulle drie beste vakansiefoto’s saam te bring. Geen kommentaar sal gelewer word nie - die foto’s sal net vertoon word vir die geselligheid daarvan.
Voorsitter Christo Wessels bedank graag die lede van die klub vir hul goeie samewerking en aktiewe deelname gedurende 2013 en wens elke lid ‘n Geseënde Kersgety en ‘n baie Voorspoedige Nuwe Jaar toe.
Navrae kan aan Christo Wessels by 082-920-9738 of Linda Kloppers by 082-550-7313 gerig word.
Hardus Botha
