Rekords SPAT

Die rekords het behoorlik gespat tydens Laerskool Gansbaai se 2017 Kleure-atletiek op 19 en 20 Januarie 2017. Twaalf nuwe rekords is opgestel en twee vorige rekords is geëwenaar.

Die Geelspan met die tema “SpongeBob SquarePants”, het die beker vir die meeste punte ingepalm. Hul spankapteins was Monique Hugo en AJ Bosch.

Die gees/sangbeker is deur die Blouspan met die tema “Navi-stam” van “Avatar” gewen.  Hulle spankapteins was Anrie van Niekerk en Gavin Middleton.

Die Victrix Ludorum vir die dag is deur Gené Cornelius ingepalm en die Victor Ludorum deur AJ Bosch.

Die nuwe rekords wat opgestel is, se atlete in alfabetiese orde is:  
George Groenewald S o/12 (Diskus - 31.47m); Janka du Toit D o/12 (Diskus - 19.23m); Jason Snoegella S o/12 (100m - 14.1sek); Joy Hans D o/9 (60m - 9.9sek); Joy Hans D o/9 (80m - 13.1sek); Miela du Toit D o/8 (60m - 10.3sek); Miela du Toit D o/8 (80m - 13.8sek); Nadine Groenewald D o/12 (Diskus - 22.17m); Philip Colyn S o/11 (Gewigstoot - 8.72m); Stefan Stieger S o/9 (60m - 9.5sek); Stefan Stieger S o/9 (80m - 12.4sek); Veno van Vuuren S o/13 (200m - 30.0sek).

Rekords wat geëwenaar is:
Joani-Lee Vos D o/10 (80m - 13.1sek); Ralpp Smit S o/11 (80m - 12.2sek). 

Foto erkenning: Sonja Walker, Hugo Fourie en Hardus Botha.   

Die opgewonde Geelspan (die “SpongeBob SquarePants”), wat die punte-beker gewen het, se spankapteins, Monique Hugo (dogters) en AJ Bosch (seuns) hou die beker trots vas. Saam met hulle is van links Christoff Dahl, Nieldré Groenewald, Charl Eksteen en Nadine Groe-newald. George Groenewald en Casey Foster verskyn nie hier nie.
AJ Bosch  ontvang  die  wenbeker  namens die Geelspan van Leana Botbyl.  Gené Cornelius, Daniel Hanekom en Francois Goosen staan by.
AJ Bosch, die Geelspan se seunsspankaptein maak hier korte mette van sy hekkies-item.
Hierdie drie Gr R’e hardloop so al wat hulle kan.Van links: Celine Vollenhoven, Surita Viljoen en Tiana Gumbrill.
Dit is duidelik dat die Graad Eentjies hulle naellope verskillend benader.  Tweede van links probeer Johan van Staden sy bes om by sy tweelingboetie, Kobus, wat heel voor hardloop, uit te kom.  Justin Bailey veg links ernstig vir ‘n wenplek en Nathan Pappas agter hulle, geniet sy atletiek.
Die Geelspan se dirigente, met die tema “SpongeBob SquarePants”, was nie juis  gepla oor die sangbeker nie - hulle het die puntebeker gewen.
Die Geelspan se Jeep, met Woens Basson agter die stuur, het vir daardie bietjie ekstra “woema” bygedra wat aan hulle die puntebeker besorg het.
Die groot oomblik vir die Blou- en Geelspanne voordat die aksie op die atletiekbaan begin het.
‘n Trotse pa, Ulrich Wessels hou sy dogtertjie, Laylah-Jade, ‘n pre-Gr R van De Kleine Gansies vas. Sy het ‘n eerste plek in haar afdeling verower.
Cool – very cool!  Die Blouspan het as die Navi-stam in Avatars opgedraf en die skare het gejuig! Voor is Gavin Middleton, met Kyra van Niekerk agter hom, Veno van Vuuren links van haar en Jay-Andra Pieters regs.
Zayd Tayop werp hier alles in die stryd om eerste by die wenstreep  te eindig tydens 'n hekkies-item.
Jancke Otto, Gr 2, is gereed vir die aksie!
Lisa-Marie van Wyk van die Blouspan se gesig wys duidelik waarom die Blouspan die sangbeker gewen het.
Die Blouspan (B) en die Geelspan (G) se dirigente tydens Laerskool Gansbaai se Kleure-atletiek het geskitter in hul tema-uitrustings en was baie vriendelik met mekaar. Voor van links Christof Dahl (G), Nadine Groenewald (G), Anrie van Niekerk (B), AJ Bosch (G) en Gavin Middleton (B). Agter vlnr Casey Foster (G), Jay-Andra Peters (B), Monique Hugo (G), Jaydene Pieterse (B), Veno van Vuuren (B), Charl Eksteen (G), Kyra van Niekerk (B) en George Groenewald (G). Kristin Wolfaardt (B) verskyn nie op die foto nie.