.jpg?width=200&height=94 "Family Restaurants")
Van 16 kinders - Oudste van 11 Oorlewendes nou 80
Sylvie Agenbach van Franskraal vertel dat die tyd so verbyvlieg, dat sy self nie kan glo dat sy nou ‘n ‘80-jarige’ vrou is nie! Sylvie, wat nog op-en-wakker is, het haar 80ste lewensmylpaal op Donderdag, 16 Mei 2024 bereik. Sy het familie-lede en vriende op Saterdag, 18 Mei 2024 met ‘n gesellige braaivleis en smaaklike bykosse en nagereg in die Birkenhead Boothengelklub se saal onthaal. Haar broer, Joe Smit het vir uitmuntende kitaarmusiek en sang gesorg - dié man mag maar kitaar speel en sing, wat hy ook gereeld tydens bootklubfunksies doen. Lesers sal van baie berigte in die verlede onthou oor Sylvie en haar Klopse Dansertjies wat gereeld by spesiale geleenthede opgetree het - altyd getooi in die fraaiste kleredrag, veral jaarliks met die aanskakeling van Gansbaai se Kersliggies. Dan was sy ook betrokke by teateroptredes, opvoerings en die Fees van die Ganse se Fynbosskou. Die kunstige Sylvie is ook ‘n lid van die SAPD Bond vir Afgetrede SAPD-lede se komitee. Voorheen het sy ook sertifikate vir Noodhulpen Brandweer verwerf. Sylvie het twee dogters, Zurane in Ierland en Deidré in Somerset-Wes en sy spog met 4 kleinkinders - almal Ouma se oogappels! Sylvie kom uit ‘n gesin met, glo dit of nie, 16 kinders. Hulle het almal tussen Bredasdorp, Hermanus en Kleinmond grootgeword. 5 van die 16 kinders is reeds oorlede, met 9 (Sylvie ingesluit) van die oorlewendes wat almal tydens haar verjaarsdagvieringe teenwoordig was - dit wil gedoen wees! Slegs twee broers, Danie van Pringle Bay en William van Pretoria kon die teenwoordig wees nie. (Sien inlasfotos op groepfoto). Nou-ja, Sylvie, die jare staan nie stil nie, nê?! - ‘n Geseënde en gesonde nuwe lewensjaar word jou toegewens!
Hardus Botha
