Sjeik Mishaal se familie besig met handeldryf op die markplein van die klein dorpie Riyahd gedurende 1356
Sjeik Mishaal, Kroonprins, tydens sy onlangse besoek aan Gansbaai
Sjeik Mishaal Al Rajih Bin Mohammed Bin Rashid Al Maktoum, Kroonprins van een van die Gulf States, het onlangs ‘n onverwagse besoek aan Gansbaai gebring. Sy voorvaders het aan-vanklik in Riyahd, Saudi Arabia gewoon toe dit nog ‘n klein dorpie was.
Hulle was hoofsaaklik han-delaars wat meel en ander produkte vanuit Egipte ingevoer het.
Op die ietwat onduidelike foto kan gesien word waar hulle besig is om hul produkte in die Riyadd Souq (mark) in die jaar 1356 te verkoop. Dit is juis daar waar hulle baie welvarend geword het nog voordat olie ontdek is.
As gevolg van welvarende jare en groot rykdomme, het die familie later ‘n eiland in die Persiese Golf gekoop waar hulle vandag nog woon, “aangesien Riyahd net té besig geword het vir hierdie nomadiese mense.” Tans is die familie besig om verskeie opsies vir die investering van geld te ondersoek, waarvan Gansbaai as ‘n stil dorpie een van die opsies is. In verbasend-goeie Afrikaans het Sjeik Mishaal, die familie se afgevaardigde, onder andere gesê: “Ons dink veral aan die koop van Gansbaai hawe waar ons graag ‘n diepsee seiljaghawe sal wil vestig. Sodoende kan heelwat van ons vriende vakansiehuise hier kom bou - natuurlik baie eksklusief met hoë mure en lyfwagte vir die beskerming van hulle privaatheid.”
Lesers wat ‘n probleem met die egtheid van hierdie berig het, kan gerus ontspan. Gansbaai Courant is besig met ‘n intensiewe ondersoek na die egtheid van Sjeik Mishaal, sy familie en sy besoek aan Gansbaai.
Hardus Botha
