Die kroon is gespan op 'n skitterende seisoen toe die 0/9-rugbyspan van die Laerskool Gansbaai onlangs 'n Curriebekerwedstryd op Nuweland bygewoon het. Die seuns se afrigter en onderwyser, Attie Barnard, het die uitstappie na die beroemde rugbyveld gereël as beloning vir hul besondere prestasie vanjaar. Hulle het al 12 hul wedstryde gewen en in die proses 67 drieë gedruk en net 4 afgestaan. As een van die kleiner skole in die Suid-Bolandse liga kan Gansbaai Laer tereg trots wees op hierdie vertoning. Die 17 seuns het gaan kyk hoe die WP teen die Goue Leeus speel. Heel gepas het die WP sy bonuspuntdrie reg voor hul sitplekke gaan druk!
Die spannetjie is vergesel van twee onderwysers, mnre Barnard en Jonathan Doyle, asook 40 ondersteuners, hoofsaaklik pa's, ma's, oupas en oumas. Die kaartjies van die seuns is deur die WP-Rugby-unie geborg en om seker te maak dat almal op Nuweland (en dalk ook TV-kykers!) van die Gansbaaiers kennis neem, is 'n pragtige banier vertoon wat deur twee ma's, Elzanne Bosch en Marchelle Mostert, geverf is. Oude Molen Distilleries het tot die groot bederf bygedra deur die span te borg met promosiemateriaal soos vlaggies, miniatuur-rugbyballe en plakkate. Vir die groepie seuns was dit 'n onvergeetlike geleentheid en hulle wil hul ouers, grootouers en ondersteuners hartlik daarvoor bedank.
Gerrit Cloete
