Voor vlnr is die organiseerders, ds Dennis Naidoo en past Beryll Coetzer saam met die gassprekers Aletia en dr Okkie Grundling, met die sprekers vanuit Gansbaai se geledere agter hulle
Die Ministers Fraternal van Gansbaai het ‘n suksesvolle Eendagkonferensie Gemeen-skapsontwikkelings-ontbyt op 19 Oktober aangebied wat positiewe gevolge vir Gansbaai se gemeenskap kan inhou.
Dr Bobo van Zyl het die verrigtinge geopen en ‘n ontspanne atmosfeer is met ‘n smaaklike ontbyt, geborg deur OK Foods Gansbaai, onder die teenwoordiges geskep.
Die Konferensie is deur ds Dennis Naidoo en past Beryll Coetzer gereël en sowat 30 gemeenskapsleiers het dit bygewoon. “Dit is ‘n gemeenskapsopheffings-werkswinkel vir die mobilisering van beter psigiologiese, fisiese, finansiële en geestelike ontwikkeling,” het ds Naidoo gesê. Die gassprekers, dr Okkie Grundling en sy eggenote, Aletia is van die Monte Christo Miqhat Christian (MCM) in die Paarl. As aanknopingspunt het dr Grundling die agtergrond en uiteindelike doelwitte van só ‘n werkswinkel uiteengesit, met hulle werksaamhede in die Paarl as voorbeeld. Aletia het in ‘n Powerpoint-aanbieding uitgestippel wat MCM in die Paarl alreeds bereik het en wat ook in Gansbaai bereik kan word. Gansbaai-sprekers, vanuit ‘n wye spektrum van die gemeenskap, is daarna aan die woord gestel, wat Overstrand munisipaliteit, Gansbaai Sakekamer, Gansbaai Toerisme, Gansbaai SAPD, Badisa, Gemeenskapspolisiëringsforum, Gansbaai Slagoffer Ondersteuningskamer, asook gemeenskaps- kerk- en ander leiers. Die teenwoordigers is daarna in 4 groepe verdeel vir samesprekings en terugvoering.
Die belangrikste aspekte vir Gansbaai wat vorendag gekom het, is armoede, dwelms en onderlinge samewerking teen hierdie probleme. “In Gansbaai het ons reeds al die bestaande strukture waarvoor MCM in die Paarl baie hard voor moes werk - al wat in Gansbaai indringend na gekyk moet word is ‘n koördinerende liggaam om aktief van hierdie strukture gebruik te maak - met almal se heelhartige samewerking,” is die belangrikste gevolgtrekking waartoe gekom is.
Dr Grundling het die samesprekings soos volg opgesom: “Die doel was om ‘n inklusiewe eenheidsforum te vestig wat die kritiese gemeenskaps-ontwikkelingsprobleme en behoeftes identifiseer en ooreenkomstig die beginsels van gesamentlike beplanning en implementering, sal help transformeer. Die voertuig van die eenheidsforum sal inklusiewe multi-dissiplinêre vennootskapsamewerking wees. Die werkswinkel het konsensus bereik oor (1) kritiese prioriteite wat onmiddellike aandag moet geniet en (2) ‘n aangewysde komitee wat die beplanningsproses verder sal lei en wat die verteenwoordigende belangegroepe in die Leraarskring sal verteenwoordig.” Deon Kloppers, Bobo van Zyl, Jolandi Sauls en John Collins is as voorlopige komiteelede, in samewerking met Gansbaai Fraternal, aangewys om die leisels in hierdie groot taak van onderlinge samewerking op te neem.
Navrae rakende Gansbaai Fraternal kan aan ds Naidoo by 028-384-1720 of 083-228-6815 gerig word, of stuur ‘n e-pos aan hom by dnaidoo2@telkomsa.net.
Hardus Botha
