Strandlopertjies vra hulp

Die Strandlopertjie Learning Centre, of te wel die bekende Strandlopertjies, is na hulp en ondersteuning op soek. Die sowat 60 kleuters tussen die ouderdomme van 2 en 5 jaar het soos die land se “stroopsoetste” kleuters opgetree tydens Gansbaai Courant se besoek aan hulle.

Die skoolhoof, Joleze Sauls sê dit is veral hulp met etes soos pap, groente en vleis wat benodig word. “Ons verskaf twee maaltye per dag, ontbyt en middagete, en ons voedsel-bronne en finansies vind dit moeilik om by te hou,” sê sy. Dan is die kleuters bedags op die koue sementvloere en die skenking van matte/matjies sal ‘n groot aanwins vir die skooltjie wees. Vir noodsaaklike instandhoudingswerk aan die trappe by die stoep en die muur tussen die kombuis en die gebou, word sement en sand dringend benodig. “Soos by enige kleuterskool sal tweedehandse speelgoed en leesboekies ook ‘n groot aanwins vir die kleuters wees,” sê Ivan Cornelius, voorsitter van die Beheerliggaam. Die skooltjie is bedags tussen 07:00 en 14:00 in bedryf, terwyl hulle ook beplan om gedurende die Desember/Januarie skoolvakansie nasorg aan werkende moeders tussen 07:00 en 17:00 te bied.

Vir enige skenkings en/of donasies kan Joleze by 078-542-8379 geskakel word, of skakel vir Ivan by 076-504-6744.

Hardus Botha


Die spannetjie “stroopsoet” Strandlopertjies saam met personeellede, met Ivan Cornelius, voorsitter: Beheerraad heel regs en die skoolhoof, Joleze Sauls langs hom