Academia Valedictory dag

Dit voel soos gister wat die eerste matriekklas van Academia deur die dorp gestap het met hul laatse skooldag. Vinnig het die tyd verbygevlieg en die tweede matriekklas het deur die dorp gestap om hul eksamennommers te ontvang en vir oulaas totsiens te sê. Vir party was dit ‘n emosionele dag en vir ander een van blydskap om eintlik klaar te wees na 12 jaar op die skoolbanke.

Die leerders het by die AGS kerksaal bymekaargekom waar die personeel van Tolbos ‘n heerlike ontbyt bedien het. Daarna is daar deur die dorp gestap na die skool. Die huidige graad elf leerders het ‘n erewag gestaan en matriekleerders en hul ouers het die saal binnegestap. Toesprake is gelewer deur Pastoor Prins, mnr Wilson, prinsipaal, mnr Ernst Niewoudt, voorsitter Skoolbeheer-liggaam, Bianca de Koning, hoofmeisie, Monica de Gouveia, hoofmeisie 2014 en mev Carien Fortuin, graadhoof.

Elke leerder is individueel na die verhoog geroep en het hul eksamennommers ontvang. ABSA bank het ‘n klein geskenkie uitgedeel om te help met die studiesessies. Baie dankie aan Mev Yvonne Roux en personeel van ABSA Gansbaai. Daar was ook drie prettige pryse uitgedeel, een vir die trotse Sharkie wat aan Jolene Filander en Juandre Spies gegaan het, die hardwerkendste Sharkie is toegeken aan Cameron Marthinus en die deurmekaarste Sharkie aan Felix Visser. Nou lê die groot leer voor en wag ons in spanning vir die dag wat die uitslae kom.

Liezel Mostert                                   
Foto's : Lizette Botha