Die gekroonde “Hobo”-koningin (3de van links), saam met haar mede-deelnemers
Gansbaai se Tuisversorgingspan onder leiding van Ena Geldenhuys het op 4 Oktober 2013 gesorg vir ‘n gesellige en suksesvolle “Hobo”-aand in Blompark se Gemeenskapsaal. Koerantpapier is as tafeldoeke gebruik en vis-en-skyfies is as ete voorgesit, met smaaklike gemmerbier wat in skoongemaakte visblikkies bedien is. “Daar was hope pret met opgewekte dansmusiek in die agtergrond,” vertel Ena.
Sy sê die span het ook ‘n humoristiese, maar leersame opvoering oor die tekens en simptone van tuberkulose aangebied, wat die gaste laat skaterlag het.
Op ‘n meer ernstige noot het Ena die gaste daarna oor die gevare wat tuberkulose vir almal inhou, toegespreek. Die gaste het spontaan besluit om self ook ‘n opvoering aan te bied, met enkele pryse wat gewen is.
Die besgeklede Visserman het ‘n prys van Fish Lady ontvang, met die “Hobo”-koningin wat ‘n kroon ontvang het en nog 4 ander pryse is aan wenners oorhandig. “Dit was ‘n moeilike taak vir die beoordelaars gewees om wenners te kies, aangesien almal se “Hobo”-uitrustings baie oorspronklik was,” vertel Ena.
Vroeër die maand het lede van Gansbaai SAPD, wat aan die jaarlikse Kannaland Vasbyt staptog deelgeneem het (Gansbaai Courant Donderdag, 10 Oktober 2013), besluit om ‘n deel van hulle surplusfondse vanjaar aan Gansbaai Tuisversorging te skenk, waarvoor groot dankbaarheid bestaan. “Baie dankie aan almal wat ‘n bydrae tot die aand se sukses gelewer het en veral dan aan die span versorgers, die beoordelaars, Fish Lady, Daleen Swart van Gansbaai Munisipaliteit en al die gaste wat die aand bygewoon het,” sê Ena.
Navrae rakende Gansbaai Tuisversorging en die groot werk wat deur hulle gedoen word, kan aan Ena Geldenhuys by 073-097-2277 gerig word.
Hardus Botha
