‘n Besoek aan Herberg-aan-see sonder verversings as ‘n verrassing en bederfie, is nie ‘n besoek nie, met Alta van Niekerk, voorsitter en organiseerder, 2de van links.
Sowat 20 dames van die NG-Vrouediens van Pearly Beach het tydens hulle besoek aan Herberg-aan-See gesorg vir ‘n genotvolle dag, gevul met verrassings. “Hierdie is ‘n jaarlikse projek op ons jaarprogram en dit bly altyd wonderlik om HaS se inwoners te besoek en te bederf,” vertel Alta van Niekerk, voorsitter.
Die kuier het begin met gesellige samesang met Alta agter die klavier. “Ons het met die sing van geestelike liedere begin en later na vrolike en opgewekte liedere oorgeskakel,” sê Alta.
“Ons het selfs instrumentjies onder hulle versprei, waarmee die bejaardes lustig kon saamtokkel.” Engela Basson het ‘n insiggewende boodskap aan die bejaardes gebring waartydens hulle daarop gewys is dat ook hulle nog ‘n waardevolle lewensrol het om te vertolk. So ‘n besonderse besoek aan HaS gaan altyd gepaard met verrassende verversing en eetgoedjies en die Pearly Beachers het seker gemaak daar is geen tekort daaraan nie.
“Baie dankie aan HaS se bestuur en personeel vir ‘n wonderlike en vriendelike ontvangs en dit was heerlik om die tydjie daar te kon deurbring,” sê Alta.
Hardus Botha
