Kwadrupleeg bouer

Kwadrupleeg Andrè Mostert in sy rolstoel voor Gansbaai Kliniek, met sy voertuig agter hom

 “’n Persoon van wie al vier ledemate verlam is,” lui die beskrywing van ‘n kwadrupleeg in die HAT-woordeboek. Dit is ook waar van Andrè Mostert (50) van Franskraal, maar van sit en niks doen in ‘n rolstoel, kan beslis nie van hom gesê word nie. Andrè is oorspronklik van Kraaifontein en het homself as ‘n loodgieter bekwaam. Gedurende 1991 het hierdie eens gesonde en fikse rugbyspeler, ‘n ernstige rugbybesering opgedoen en is sedertdien ‘n kwadrupleeg wat in ‘n rolstoel vasgekluister is.

“Ek het sowat 12 jaar gelede na Gansbaai verhuis waar ek steeds goed aan die gang is,” vertel hy. Hy bestuur sy bouery en bouspan met kundigheid en sy regterhand wat hom by-staan is Johnny Rooi, wat ook sy voertuig-bestuurder is.

“Ek doen enige bouwerk en het nou weer ‘n projek gekry vir die bou van ‘n dubbel-motorhuis,” sê Andrè. Van gaan lê en wonder wat die dag van môre gaan oplewer, is daar op hierdie stadium geen sprake by Andrè nie. Slegs enkele voorbeelde van vele suksesvolle kwadrupleë is Pieter (Super Piet) du Preez van Sunninghill wat in Australië die eerste man ter wêreld geword het wat ‘n Ysterman-kompe-tisie kon voltooi, Philippe Croizon wat tussen die wêreld se vyf kontinente geswem het en ‘n vooruitstrewende boer, Ampie Bredenkamp van die plaas Lieberwalt, Vanderkloof, wat spog met sy “4x4” (elektriese rolstoel met breë wiele) vanwaar hy sy plaas bestuur.

Huiseienaars wat bouwerk oorweeg, kan gerus Andrè Mostert se bedrewenheid op die proef stel. Hy kan by 079-912-8167 gekontak word.

Hardus Botha