Teelepelete verras

Al giggelende is daar (met wantroue) teelepel vir teelepel kos opgeskep, met verbasing aan die einde oor die hoeveelheid kos op die bord, met almal se spieëlbeelde regs

OMGEE Bedieninge se “Teelepel-ete” van Sondag, 10 November, het heelparty gaste verras - dis nou met die hoeveelheid kos wat met ‘n teelepel opgeskep kan word. Die groot verskeidenheid van geregte het natuurlik ‘n rol in die “byna oorvol” borde kos gespeel. “Ek het die spulletjie so bekyk en besluit om stilletjies twee teelepels te skep by die geregte wat ekstra lekker gelyk het, maar het my liederlik misgis met die oorvol bord waarmee ek verleë tafel toe moes stap,” het ‘n anonieme gas saggies vertel. Sowat 100 gaste het vir die interessante ete opgedaag en niemand is teleurgestel nie - nie met die oorgenoeg voedsel nie en nog minder met die aangename en gesellige samesyn. Sowat 18 smaaklike geregte is in twee rye uitgepak, met nagereg as die laaste opsie. Die geregte het gewissel vanaf bobotie met rys, verskillende vleise tot by groentes, pasta’s en slaaie - met roomys en vla waarmee afgesluit is.

“Die ete was as ‘n gemeenskapsprojek bedoel en wat dit nog meer aangenaam gemaak het, was die teenwoordigheid van verskeie kerkgroepe wat saamgekuier en saamgeëet het,” vertel Deon en Linda Kloppers. Selfs ds Dennis Naidoo, voorsitter van Gansbaai Ministers Fraternal, se kerrie-gereg was beskikbaar! “Samesyn van hierdie aard is wat Gansbaai lekker maak en volgende jaar gedurende Meimaand doen ons dit weer,” sê Linda.

Hardus Botha