Die jaarlikse aanskakeling van Gansbaai en omgewing se Kersliggies is op hande. Daar word reeds hard deur Gansbaai Munisipaliteit gewerk om seker te maak al die liggies en pragtige voorstellinge met behulp van liggies wat jaarliks die dorp versier, sal vir die groot aand gereed wees.
Die besonderse aand gaan jaarliks met groot opgewondenheid gepaard en wanneer die applous direk ná die aanskakeling bedaar het, word daar geselling deur al drie gemeenskappe saamgekuier.
Vanjaar val die aanskakeling van die liggies saam met die jaarlikse Fees van die Ganse wat die volgende dag in die middedorp in die vorm van ‘n Straatfees sal plaasvind. Enkele plaaslike kunstenaars se optredes vir Vrydagaand is deur die Feeskomitee gereël en daar sal heerlik saamgesing kan word, met etlike stalletjies wat beskikbaar sal wees. ‘n Tweede hoogtepunt van die aand sal die kroning van Mej Fees van die Ganse wees, wat nie misgeloop mag word nie. Die belangrike datums is Vrydag, 6 Desember vir die aanskakeling van die Kersliggies en die Fees van die Ganse op Saterdag, 7 Desember.
Navrae kan aan Glenda Kitley by 072-291-5564 gerig word.
Hardus Botha
