Dit is presies waar die reëlings tans staan…Fees, Fees en nogmaals Fees. Die jaarlikse Fees van die Ganse val vanjaar saam met 'n gholfkompetisie en die aanskakeling van die Kersliggies op Vrydagaand, 6 Desember, met die Straatfees in die middedorp die volgende dag op Saterdag, 7 Desember. Soos jaarliks die geval is, kan inwoners en besoekers weer na ‘n genotvolle dag uitsien. Die gewone sal vanselfsprekend daar wees: hoofkunstenaar, plaaslike kunstenaars, stalletjies vir Afrika (±30), biertent en veel meer. Die Fees se hoofkunstenaar vir Saterdagaand vanaf 19:00 tot 20:00 is Wynand Windpomp en daar kan beslis na sy optrede uitgesien word.
Vanjaar is daar onder andere ook twee nuwighede wat stalletjies betref. Die een sal ‘n egte poedingstalletjie wees, ‘n eerste vir die Fees van die Ganse, aangebied deur Huis Breda. Die tweede “nuwe” stalletjie sal beslis die aandag trek. Rian Malan van Intec Marine in die Kaap gaan die nuutste vorme en toerusting van mariene elektronika bekendstel. Onder andere sal dit alle elektroniese skeeps-navigasie intrumente insluit, wat sekerlik booteienaars en ook ander sal interesseer. Hy sal egter ook huishoudelike elektroniese toerusting en stelsels beskikbaar hê, onder andere weerstasies. Beslis ‘n stalletjie wat nie misgeloop mag word nie.
Die hoofaktiwiteite sal in die omgewing van Markstraat aangebied word - dus, soos Gansbaaiers lankal reeds gevra het, binne in die dorp.
Hou Gansbaai Courant dop vir meer volledige inligting nader aan die tyd. Maak dus nou reeds ‘n kalender-aantekening van Vrydagaand, 6 Desember en Saterdag, 7 Desember vir ‘n feestelike naweek soos min wat deur almal geniet sal word. Navrae kan aan Glenda Kitley by 072-291-5564 gerig word.
Hardus Botha
