Bietoubossers en Brouery

Daar word aandagtig na Sarah Boshoff geluister tydens ‘n toer deur die Birkenhead Brouery

“Ons jaarafsluiting is vanjaar by die Birkenhead Bierbrouery te Stanford gehou,” vertel Elizma de Lange van die Bietoubos Damesklub van Perlemoenbaai en De Kelders. Die groep dames, sowat 40 plus “aanhangsels”, het op 12 November daar gaan kuier en natuurlik in die restaurant ook gedraai. “Die pragtige landelike omgewing het tot ‘n heerlike en rustige saamkuier, so vir oulaas in 2013, bygedra.” Elizma vertel dat hulle vriendelike gasvrou, Sarah Boshoff van die brouery, gesorg het vir ‘n smaaklike ligte maaltyd van vis, skyfies en slaaie. Sarah het hulle ook op ‘n kort, maar interessante toer, deur die brouery geneem. Daar het hulle onder andere gehoor dat 6 verskillende biere en 2,000ltr bier per dag gebrou word. “Maar deesdae produseer hulle ook wyne,” vertel Elizma. “Dít doen hulle so goed dat hulle Saugvignon blanc onlangs ‘n silwer toekenning ontvang het.” Die dames het glo in ‘n mooi reguit ry, ná die heerlike afsluiting, veilig na Gansbaai teruggekeer.

Die klub se volgende vergadering sal op 14 Januarie 2014 plaasvind. Navrae kan aan voorsitter Annette van Zyl by 028-384-1075 gerig word.

Hardus Botha