2de Ambulans vir Medical Response

In die middel is Overstrand Medical Response se tweede ambulans, met die eerste wat regs sigbaar is

Overstrand Medical Response van Cassie Carstens en Riaan Buys se tweede ambulans is byna ‘n realiteit.

“Ons tweede ambulans is reeds aangekoop en sodra die opknappingswerk afgehandel is en die nodige kentekens aangebring is, sal dit in bedryf gestel word,” vertel Riaan.

Hy bedank graag die volgende borge wat die aankoop van die ambulans moontlik gemaak het: Louw Vervoer van die Paarl van Piet en Jonine Louw (Hoofborg - R77,000); Almal wat by die spesiale Gholfdag betrokke was (R10,500); Marjaan van Tonder van Head a Hair se twee Romanza-aande, met Helmie en Amanda de Vries as gasheer en -vrou (R1,230). “Ongelukkig het die verkeerde persepsie onder gemeenskapslede ontstaan oor wie die hoofborg vir die ambulans is, wat Louw Vervoer van die Paarl is,” sê Riaan. “Ons opregte dank en waardering aan elkeen van die genoemde borge, waarsonder die ambulans nie aangeskaf sou kon word nie.”

Riaan en Cassie se personeel bestaan tans uit Chantell Buys en Steven Breytenbach, saam met 2 vrywilligers Sueanne Hugo en Abri van Wyk.

Ria Smit van Franskraal het spesiaal versoek dat hierdie groep bedank moet word vir hulle wonderlike optrede tydens die afsterwe van haar eggenoot, Fanie op 27 September vanjaar. “Mense kan gerus by hulle aansluit, hulle lewer fantastiese dienste,” het sy gesê.

Vir flink ambulansdiens kan 078-699-6995 vir noodgevalle geskakel word, terwyl Cassie by 078-427-8647 en Riaan by 083-881-3631 vir enige verdere inligting geskakel kan word. Navrae kan ook aan hulle by overstrandmedics@gmail.com ge-epos word.          
                                           
Hardus Botha