Suksesvolle Kunsuitstalling

‘n Deel van die kunstenaars tydens Marie Reid se kunsuitstalling, met vlnr Liezel Mostert, Susan Le Roux Wagenaar, Angelique Nagel, Monika Matthee, Marie Reid, Heinrich du Plessis, Jeanre de Bod en Martha van der Westhuizen.

Nege kunstenaars het aan die Gansbaai Kunsuitstalling wat op 22 en 23 November in die Katolieke Kerksaal aangebied is, deelgeneem. “Ek het die uitstalling gereël omdat ons so baie van Baardskeerdersbos se Kunsroetes lees, terwyl ons uitmuntende kunstenaars in en om Gansbaai het,” vertel Marie Reid van Marie’s Boutigue, Art & Beauty Shop.

Marie skilder self ook, maar het besluit om die uitstalling net te reël en te organiseer, waaraan 10 kunstenaar deelgeneem het. “Ek is dankbaar dat die uitstalling fantasties afgeloop het, met van die kunswerke wat wel verkoop of bestel is,” sê Marie. “Daar is reeds groot belangstelling vir ‘n herhaling van hierdie kunsuitstalling vroeg volgende jaar.” Die twee dae het ook gesellig verloop en daar kon ontspanne en met verversings saamgekuier word terwyl die kunswerke besigtig is. Van die 10 kunstenaars wat aan die uitstalling deelgeneem het, is 7 skilderkunstenaars, naamlik Angelique Nagel, Ivy van Huyssteen, Liezel Mostert, Monika Matthee, Olga Carpenco, Petro van der Merwe en Susan Le Roux Wagenaar. Die ander 3 is fotografiese kunstenaars, naamlik Heinrich du Plessis, Jeanre de Bod en Martha van der Westhuizen. Die kunswerke wat uitgestal is, is goed en met vele komplimente deur die besoekers ontvang. Marie het sowat 5 jaar gelede by die Great White House met haar skilderkuns begin en is nou sowat 2 jaar die eienaar van Marie’s Boutigue, Art & Beauty Shop te Kerkstraat 42.

Belangstellendes rakende ‘n volgende kunsuitstalling kan vir Marie Reid by 083-310-1733 skakel, of stuur ‘n e-pos aan haar by marie.bliksie@gmail.com.

Hardus Botha