Wat ‘n voorreg was dit nie om vir die laaste keer te vergader nie. Wat egter die geleentheid so spesiaal gemaak het, was die feit dat ds Dennis Naidoo vir ons die boodskap by hierdie laaste bymekaarkoms gebring het. Sy boodskap het gehandel oor waardig oud word en dit was vir ons almal ‘n goedvoel boodskap. Dis veral hier teen die einde van die jaar as mens so moeg en afgemat voel, dat so ‘n wonderlike boodskap jou weer laat besef dat Jesus almal lief het en dat ons almal vol genade leef. Dit was ‘n inspirerende boodskap wat ons almal met ons kan saamdra tot volgende jaar wanneer ons weer die nuwe jaar moet aanpak. Bo en behalwe dit is ons ook op sy eie spesiale breyani getrakteer.
Dit was heerlik en ons almal het heerlik daaraan gesmul. Amper het ons vergeet om plek te laat vir Izette se heerlike koekstruif. Ons klassie bestaan al amper 20 jaar en ons mag enige handwerk doen of sommer net gesels en ons bedank die Lede in Christus Kerk en Pastoor Hamman en sy vrou vir die gebruik van hulle kerk vir ons klassie. Ons bedank ook Marina Bruwer en Marie-Anna van der Merwe vir hulle leiding en boodskappies deur die jaar.
Mari Botha
