Gansbaai Seniorklub se lede tydens hul jaareindfunksie wat spoggerig vir ‘n foto poseer, met Angela Caie voor links
Gansbaai Seniorklub het onlangs ‘n interessante Jaareindfunksie gehad. Vanjaar was hulle tema: “Trek aan soos jou gunsteling film- of boekkarakter”. Dit het aanleiding tot heelparty “eienaardige” klere-uitrustings gegee. Die groep het hul funksie in die Katolieke Kerksaal aangebied en daar is behoorlik met allerlei uitrustings gespog.
“Vanjaar het ons besluit om geen geskenke aan mekaar te oorhandig nie,” vertel Angela Caie, leier van die groep. Sy sê hulle het besluit om eerder die geskenke se geld bymekaar te gooi en dit vir liefdadigheid aan te wend. Hierdie mooi gebaar van hulle het gesorg vir ‘n ekstra donasie aan BARC en aan die Gansbaai Lionsklub. Juanita Hage het gesorg vir ‘n smaaklike Kersete waarmee die seniors hul jaar kon afsluit. Die groep aktiewe lede (en aktief is hulle beslis!) van Gansbaai Seniorklub gaan nou bietjie tot ruste kom en sal vanaf einde Januarie 2014 hulle aktiwiteite voortsit.
Belangstellende senior burgers, mans en dames, kan vir Angela Caie by 084-431-9272 skakel.
Hardus Botha
